Politikki

Aaqqissuusseqqinnerup ileqqaagaqarnissaq pilerinarsisissavaa

Utoqqalinersiaqalereernerup kingorna sulinermi utoqqalinersianik ilanngaatsittarunnaarnissaq, soorlu tamanna siusinnerusukkut ileqquusoq, utoqqalinersiat pillugit aaqqissuusseqqinnerup piviusunngortissavaa.

Allattoq Apollo Jeremiassen, Thomas Munk Veirum

decembarip 29-at 2015 16:53

Aaqqissuusseqqinnermi utoqqalinissamut aningaasanik ileqqaagaqartarnerup iluanaarutigineqarnerusalernissaa siunertaavoq.

- Aaqqissuusseqqinnginnermi aningaasamik 1 koruunimik ileqqaagaqaruit taava utoqqalinersiassat 1 koruunimik ilanngarneqassaaq.

Utoqqalinersiat aaqqissuuteqqinnginnerini malittarisassat taamaapput, tamannalu allanngortinniarpaat.

Taama assersuusiortoq tassaavoq ilaqutariinnermut, naligiissitaanermut inunnullu isumaginninnermut tunngasunut naalakkersuisoqarfimmi siunnersortit pisortaat, Morten Bovbjerg.

Aamma atuaruk Utoqqalinersianut inatsimmut nutaamut kommunit piareersimapput

Taanna aamma oqarpoq, utoqqalinersiaqalernissamut ileqqaagaqartarneq maanna imminut akilersinnaanerulissasoq, tassami ileqqaakkat utoqqalinersiaqalernermi ilanngaanneqartarunnaartussaammata.

Utoqqalinersiat pillugit aaqqissuusseqqinnermi pitsannguutit ilaat tassaavoq, utoqqalinersiaqalereernermi piffissap ilaani sulinermi akissarsiarineqartut utoqqalinersianit ilanngaanneqartarunnaarnissaat.

- Utoqqalinersiaqalersut sapaatip akunneranut akunnerit qulit, 15-nit imaluunniit 20-it sulinerminni tamanna annaasaqaatigisarunnaassavaat, Morten Bovbjerg KNR-imut oqarpoq.

Utoqqalinersiat marloqiusanngorlugit aaqqissuussaapput

Utoqqalinersiat marloqiusanngorlugit aaqqissuussaapput. Aappaa tassaalluni tunngavisumik utoqqalinersiat aappaalu tassaalluni utoqqalinesiaqarnermi tapiliunneqartartussaq. Akissaatikinnerit aningaasanik amerlanernik pisartagaqalernissaat aamma ileqqaagaqarsimasut taamaaliornerminni pillarneqartannginnissaat, taama aaqqissuusseqqinnikkut anguneqassaaq.

Utoqqqalinersiat pillugit aaqqissuusseqqinnermi utoqqalinersiaqartoq sulinermini maanna ukiumut 332.000 koruuninik, sinnerlugilluunniit ilanngaatitaqanngitsunik akissasiaqarsinnaatitaalerpoq, taakkuli sinneraanni aatsaat utoqqalinersiat ilanngarneqartassallutik.

Aamma atuaruk GE aamma SIK: Utoqqalinersianut aaqqissuusseqqinneq naammaginarpoq

Morten Bovbjergip nassuiaanermini assersuutigaa, utoqqalinersiaaqartoq ukiumut 100.000 koruuninik utoqqalinesiaqarnermi saniatigut akissarsiaqaruni, taakku saniatigut 13.605 koruuninik pisartagai ilaneqartassasut.

Morten Bovbjergip aamma erseqqissaatigaa, utoqqalinersiat saniatigut sulinermi akissarsiarineqartut qaammatit aqqaneq marluk aatsaat qaangiukkaagata taakku naatsorsorneqartassammata aamma erseqqissaatigalugu akissarsiat allanngoraagata taakku kommunimut nalunaarutigineqartarnissaat pingaaruteqartuusoq.

- Utoqqalinersiaqarnerup saniatigut aningaasarsiorunnaaraanni tamanna kommunimut nalunaarutigineqartarnissaam pingaaruteqarpoq, tassami utoqqalinersiassat nutaamik naatsorsorneqartartussaasassammata.

Ilaqutariinnermut, naligiissitaanermut inunnullu isumaginninnermut tunngasunut naalakkersuisoqarfimmi siunnersortit pisortaat, Morten Bovbjerg taama KNR-imut oqarpoq.