Utoqqalinersianut inatsimmut nutaamut kommunit piareersimapput
Utoqqalinersianut inatsit nutaaq januaarip aallaqqaataani atuutilissaaq.
Inatsimmut nutaamut Kommunit nalimmassarnissaannut piffissaq sivikippallaarnerarlugu Naalakkersuisut inatsit akuersissutigimmassuk illuatungiliuttunit isornartorsiorneqarnikuupput.
Kommuneqarfiilli allannguutinut piareersimallutik maanna oqaatigaat.
Inatsisinut nutaanut ilitsersuinissamut allaffissornermilu isumagisassanut piffissaq kingulleq atorlugu suliarigaluarlugu Kommuneqarfik Sermersooq piareersimavoq.
- Soorunami piareersimaffigivagut kisianni piffissakitsuararsuusimavugut iluarsinissaannut, Kommuneqarfik Sermersuummi Isumaginninnermik suliaqartoq Hans Jensen oqarpoq.
Aamma atuaruk GE aamma SIK: Utoqqalinersianut aaqqissuusseqqinneq naammaginarpoq
Qaasuitsup Kommuniani isumaginninnermi pisortap Henrik Soloyip utoqqalinersianut suliaqartut nersualaarpai. Innuttaasunillu utoqqalinersiat kisinneqarneri pillugit naammagittaalliortut ikittuinnaasimanerarpai.
- Ingerlalluarsimavoq, tupaallannartutullu tamanna oqaatigisinnaavara, Henrik Soloy oqarpoq. Qeqqata Kommunianit inatsisinut nutaanut nalimmassarneq aamma ajornartorsiutaasimanngitsoq Ilaqutareeqarnermut pisortap Kenneth Thomsenip oqaatigaa.
Aamma atuaruk Utoqqalinersisinnaanermut ukiut qummut killigititat qaffanneqarput
Kommune Kujallermi suleriaatsimut nutaamut aamma piareersimapput taamaattorli inuiaqatigiinnut paasititsiniaanermut piffissaq sivikippallaarnerarlugu.
- Piffissaqarnerorusussimagaluarpugut tassami Inatsisartut ukiarmi akuersissutiginerannit piffissaq sivikissimavoq piareersarnissamut. Aamma paasissutissiiniarnerit annikipput, Isumaginninnermi ataatsimiititaliami siulittaasoq, Stine Egede Nørbæk oqarpoq.
Utoqqalinersiaqalersinnaanermut ukiut killigitat 65-init 66-inut 2017-imi januaarip aallaqqaataani qaffassapput, 2016-imili innuttaasunut sunniuteqartussat aamma allaapput.
Aamma atuaruk VIDEO Utoqqalinersianut aaqqissuusseqqinneq taperserneqartoq
Ukiumut isertitat 221.111 koruunit ataappagit utoqqalinersiaqalertoqarsinnaanngussaaq aapparisaq suliffeqaraluarpalluunniit. Inatsit atorunnaartussaq malillugu aapparisap isertitai malillugit utoqqalinersiat naatsorsorneqartarneri taamaasilluni atorunnaartussanngortoq, Hans Jensenip aamma oqaatigaa.
Aamma atuaruk Utoqqalinersiuteqalernissamut ukiorititat qaffanneqarnissaat Partii Naleqqap isumaqatiginngilaa
Peqatigiiffimmi utoqqaat nipaanni tamanna nuannaarutigineqarpoq.
Isumaqarpunga maannakkut angusaq pitsaalluinnartuusoq ajunngitsorlu. Taannalu qujanarpoq akuersissutigineqarnikuummat, Utoqqaat Nipaata siulittaasua Else-Lea Olsen oqarpoq.
