VIDEO Utoqqalinersianut aaqqissuusseqqinneq taperserneqartoq
Inatsimmut allannguutissatut siunnersuut akuerineqassaguni aappaagu Januarip aallaqqaataani atuutilissaaq.
Utoqqalinersiuteqarsinnaaneq 65-inik ukioqalernermiit pinnani ukioqqortunerulernerermi aatsaat pisalissasoq, Naalakkersuisut siunnersuutaat ippassaq Inatsisartut siullermeerlugu oqallisigimmassuk, partiit amerlanerussuteqartut taperserpaat.
Aamma atuaruk VIDEO IA-p soraarnerussutisianik aaqqissuusseqqinnissaq allanngortikkusuppaat
Inuit Ataqatigiilli inatsisip atuutilersineqarnissaanut piffissaq sivikippallaartoq isumaqarput. Sukkavallaamik ingerlasoqarneratigut nunatsinnut ajorseriaataasussatut isigigaat.
- Nunatsinni atugarissaartitanut ajorseriaatitut annertuutut taasariaqarpoq. Ilumut taamaattariaqarpa?, Inuit Ataqatigiit oqaaseqartua qoallinnermi Juliane Henningsen aperivoq.
Inuit Ataqatigiit aamma partiinnut isumaqatiginninniutingerusuppaat utoqqalinersiallit kisermaat qanoq annertutigisumik qaffaavigineqarsinnaanersut.
Kisermaat pisariaqartitsinerpaasutut salliutinneqartariaqartut pingaartippaat.
Aamma atuaruk Pensionisiaqarneq pillugu inatsisissatut siunnersuut ukiaru oqallisigineqassaaq
Demokraatit utoqqalinersianut aaqqissuusseqqinneq taperserpaat. Inuit Ataqatigiillu isumaqatiginagu utoqqalinersiallip inooqataata isertitaat aallaavigalugit nalilersuisoqartartoq. Ullutsinnut naapertuuttumik nalilersuisoqartarnissaa Demokraatit isumaqarput.
Aaqqissuusseqqiinermut siunnersuut Atassutip aamma taperserpaa. Utoqqaat peqqissut amerliartorneri ilutigalugu aningaasallu ikiliartormata aaqqissuusseqqiineq piareerneqartariaqartoq isumaqarlutik.
Partii Naleqqap Naalakkersuisut siunnersuutaat akuerinngilaat
- Partii Naleqqamiit isumaqatiginagulu akuersaanngilluinnarparput Utoqqaqarpormi sulerulunnikunik utoqqalinersiaqalernissaminnut erinisuttunik, Anthon Frederiksen oqarpoq..
