VIDEO IA-p soraarnerussutisianik aaqqissuusseqqinnissaq allanngortikkusuppaat

Ukiut soraarninngorfissat aaqqissuuteqqinnissaat aqagu Inatsisartuni oqallisigineqassaaq. Soraarnerutisialinnut assigiinngitsutigut pitsaanerusunik atugaqalernissamik imaqarpoq. Tamannali ukiut soraarninngorfissat qaffannerisigut akilerneqassaaq. Kingullerli taanna Inuit Ataqatigiit 2017-imi atuutilereernissaa isumaqatiginngilaat.

- Siusippallaarpoq, qanippallaarlunilu, Juliane Henningsen KNR-imut oqarpoq.

Immikkut ilisimasallit arlallit oqaatigereerpaat soraarnerutinik aaqqissuusseqqinneq nunatta aningaasaqarneranut allannguutaavallaarnavianngitsoq.

Aamma atuaruk Pensionisiaqarneq pillugu inatsisissatut siunnersuut ukiaru oqallisigineqassaaq

Ukiuni tulliuttuni aningaasat isertitat atukkallu imminnut ataqatigiinnginnerisa aaqqinniarnissaanut annikitsuaraannarmik aaqqissuusseqqinneq aaqqiissutaasinnaasoq, Aningaasaqarnermut siunnersuisooqatigiit aalajangersumik oqaatigaat. Aaqqissuusseqqinnermi aningaasaqarnermut iluaqutaasinnaasutuaq tassaavoq ukuit soraarninngorfissat qaffanneri. Tassalu tamanna IA-p allanngortikkusutaa.

- Utoqqaat inuunertik naallugu soraarninngornissaminnut piareersarsimasut tassanngaannaq utaqqeqqittussanngussapput, Juliane Henningsen oqarpoq.

Siumut ukiut soraarninngorfissaq qaffannissat tapersersorpaa.

- Aaqqissuuseqqinneq utoqqaat atugarisaanut pitsannguutissanik imaqarpoq, Jess Svane oqarpoq.

- Tamassuma saniatigut ukiorpassuit sulisimagaanni 65-inik ukioqarluni soraarninngortoqarsinnaavoq, Siumumit oqaaseqartartoq naggasiivoq.