GE aamma SIK: Utoqqalinersianut aaqqissuusseqqinneq naammaginarpoq

Utoqqalinersianut aaqqissuusseqqinneq pisariaqarlunilu silatusaarnerusoq SIK GE-lu isumaqarput. Taamaattoq Nunatsinni aningaasameernermi aaqqiiniarnerusoq GE-p pisortaa Brian Buus Pedersen oqarpoq.

Allattoq Apollo Jeremiassen, Ane-Marie Petersen

novembarip 16-at 2015 13:28

Utoqqalinersiutinut aaqqissuusseqqiineq Inatsisartuni ilaasortat amerlanerussuteqarlutik tallimanngormat akuersissutigaat. Utoqqalinersiaqarsinnaanermut ukiunut killigititat 65-init 66-inut 2017-imi qaffanneqartussanngorput, 2021-imilu aamma ukiumik ataatsimik, tassa 67-inut, aaqqissuusseqqinnermi allannguutit ilagaat.

Utoqqalinersisinnaanermut aaqqissuusseqqiinermi nunatsinni inuuneqqortusiartornitsinni ukiunut qaffaaneq Sulisitsisunit nuannaarutigineqarpoq.

Aamma atuaruk Utoqqalinersisinnaanermut ukiut qummut killigititat qaffanneqarput

Aamma Sulinermi Inussutissarsiuteqartut kattuffiata tamanna naammagisimaarpaa.

- Inatsisissamik siunnersuut ataatsimut isigigaanni SIK-miit naammagisimaarparput aamma peqqutigalugu ilaasortatsinnik saaffigineqartaratta suli sulerusukkaluartunik kisiannili 65-inik ukioqalernertik pissutigalugu soraarninngortariaqarsimasunik, suliffeqarfik politikkeqarsimappat 65-iliigaangamik soraarninngussasut naak sulerusukkaluartut, SIK-p siulittaasua Jess G. Berthelsen oqarpoq.

Aaqqissuusseqqinneq Sulisitsisut Peqatigiiffiannit aamma nuannaarutigineqarpoq. Nunatsinni inuuneqqortusiartortoqarnera malillugu nalimmassaasoqarneranut.

- Aaqqissuusseqqinneq pisariaqartuusoq silatusaarnerusorlu isumaqarpugut. Kalaallit Nunaanni inuuneqqortusiartorneq ilutigalugu utoqqalinersiaqarsinnaanermut ukiunut killigititat naleqqussarneqarmata. Utoqqaat amerlanerusut sulisinnaalissapput, aningaasartuutillu annikillillutik tamannalu Nunatta aningaasaqarnermut pitsanngorsaataassalluni, Brian Buus Pedersen oqarpoq.

Aamma atuaruk Ataatsimiititaliaq utoqqalinersiutit pillugit sulileruttorpoq

Aningaasartuutaassaaq

Taamaakkaluartoq inatsit nutaaq suli pitsanngorsarneqarsinnaasoq, Sulisitsisut Peqatigiiffiata pisortaa oqarpoq.

- Isorisarput tassaavoq utoqqalinersiat pillugit iluarsartuusseqqinnerup saniatigut aamma aningaasartuutissanik allanik nutaanillu pilersitsisoqarmat, Brian Buus Pedersen oqarpoq erseqqissaallunilu:

- Utoqqalinersiutit qaffaavigineqarput tamanna aningaasarpassuarnik naleqarpoq. Eqqaamaniarpara aningaasartuutissat naatsorsorneqarneri 30 - 40 millionit koruunit missaanniittut. Aningaasameernerup nalaani tamanna akissaqartinngikkipput Sulisitsisut Peqatigiiffiannit isumaqarpugut, Brian Buus Pedersen oqarpoq.

Inatsisartut nutaamik inatsisiliornerat, SIK-mit aamma naammagisimaarneqaraluartoq, taamaattoq arlalinnik suli ilanngussaqarusukkaluarput.

- Arlaliugaluarput inatsimmut ilanngukkusutaraluagut soorlu assersuutigalugu 67-it qaangerlugu ukiullit suli sulerusukkaanni taava qaavatigut utoqqalinersiat ilanissaat, Jess G. Berthelsen oqarpoq.