Ataatsimiititaliaq utoqqalinersiutit pillugit sulileruttorpoq

Siunnersuut pillugu paatsooqatigiittoqanngissaa anguniarlugu, ilaqutariinnermut ataatsimiititaliaq taamaaliortoq, ataatsimiititaliami siulittaasoq, Tillie Martinussen, Demokraatit, oqarpoq.

- Utoqqalinersiuteqalernissamut ukiorititat qaffanneqarnissaannut kingunerisinnaasat pillugit paatsoortoqarsimanissaa ernumassutigisinnaavara. Inuit pineqartut soorunami sapinngisaq tamaat qajassuunniarpavut, ukiorititalli qaffanneqarnissaat pisariaqartoq aalajangiusimallutigu, Tillie Martinussen oqarpoq.

Naalakkersuisut utoqqalinersiuteqalernissamut ukiorititat qaffanneqarnissaannut siunnersuutaat Inatsisartunit taasissutigineqannginnerani ataatsimiititaliami suliarineqaqqaassaaq utoqqalinersiuteqarnermullu attuumassuteqartut tamarmik tassani tusarniarneqassallutik.

Utoqqaat Peqatigiiffiat taakkununnga ilaavoq. Taakku siornatigut oqaaseqaateqartinniaraluarput akisimanngitsutulli allaqqallutik.

Utoqqaalli peqatigiiffianneersup Else Lea Olsenip allakkanik nassiussisimalluni oqaatigaa.

- Allakkat taakku partiinut tamanut nassiunnikuuavut. Allakkallu taakkua tunngavigalugit ilaatigut sianertoqarlunilu eqqartuisoqarnikuuvoq, Else Lea Olsen oqarpoq.

Utoqqaat Peqatigiiffiannit utoqqalinersiuteqalernissamut ukiorititat qaffanneqarnissaat akerleralugu oqareerput.

Utoqqaalli Nuummiinnaanngitsoq tusarniarfigineqarnissaat pingaaruteqartoq, Tillie Martinussen oqarpoq.

- Utoqqaat peqatigiiffii sinerissamiittut siunnersuummut iluarisimaarinnittut tusareerpagut. Taava utoqqaat peqatigiiffii assigiinngitsut qanoq oqarnersut unittoorfiginaveersaassavagut, Tillie Martinussen oqarpoq.