Utoqqalinersiuteqalernissamut ukiorititat qaffanneqarnissaat Partii Naleqqap isumaqatiginngilaa
Nunatsinni utoqqalisartut ukioqqortusiartorneri pillugit Naalakkersuisut siunnersuuteqarnerminni tamanna tunngavilersuutigigaluaraat, tamanna Partii Naleqqamit isumaqatigineqanngilaq.
- Utoqqaat inuunermi sivisunerpaartaani sulereerlutik inuiaqatigiinnilu qaffassaaqataareerlutik toqqissisimanartumik utoqqalisarnissaat pingaartutut isigigatsigu, siunnersuummut isumaqataanngilagut, Partii Naleraq sinnerlugu taama tusagassiuutinut nalunaarpoq, Anthon Frederiksen.
Taanna isumaqarpoq, utoqqaat 65-inik ukioqalereernerminni qaqugukkut utoqqalinersiuteqalernissartik namminneerlutik tamanna aalajangertassagaat.
Utoqqalinersiaqalernermi ukiut qaffanneqarnissaat Naalakkersuisut siunnersuutaa, Inatsisartut ullumi ataatsimut ataatsimiinneranni tamanna siullertut oqaluuserineqassaaq.
Tamassuma saniatigut aamma siullermeerlugu oqaluuserineqassaaq, inuk pillugu paasissutissanut tunngasoq. Tassani Inatsisartut aalajangiiffigissavaat, Danmarkip inatsisaata Nunatsinni atuuttussanngortinneqarnissaa, maannamullu Nunatsinni atuuttup atorunnaarsinneqarnissaa aalajangiifigineqassalluni.