Imeruersaatinut eqeernartulinnut akitsuut ilaatigut oqallisigineqassaaq
Inatsisartut siunnersuutaat 57-it Naalakkersuisullu siunnersuutaat 29-it ataatsimiinnerni sammineqassapput.
Ilaatigut aningaasaqarnermut naalakkersuisup Randi Vestergaard Evaldsenip erngup puiaasamiittup imigassallu koffeinimik akullit akitsuuserneruneqarnissaannik siunnersuutaa oqaluuserineqassaaq.
Aamma atuaruk IA: Attaviitsup tusarneqarnissani amigaatigaa
Inatsisartullu siunnersuummut akuersissappata, imeruarsaatit eqeernartutallit liiterimut akitsuutaat 7, 5 koruuniniit 15 koruuninut qaffanneqassaaq.
Imeruarsaatit eqeernartutallit kulsyritaqanngitsut aamma akitsuuserneqassasut, Evaldsenip siunnersuutigaa. Tassalu assersuutigalugu kaffit nillertut qillertuusamiittut akitsuuserneqarsinnaalissapput.
Nunatta karsiata soraarnermusianinngaanniit isertitaqarnerulernissaa Naalakkersuisut aamma kissaatigaat.
Aamma atuaruk Akitsuutit assortuussutaasut nunatta karsianut ima iluanaarutaatigipput
Nunatsinni sulisoq soraarnersiuteqarnermut karsinik nunani allaneersunik atuisuuppat, soraarninngornermilu nunamut allamut nuuppat, soraarninngornermi aningaasannataavinut akileraarutissat Nunatta karsianut pineq ajorput.
Taamaammat soraarnerussutisiaqarnissamut aaqqissuussinernut nunani allaniittunut akiliutit akileraaruserneqartarneranik siuartitsinissaq Randi Vestergaard Evaldsenip siunnersuutigaa.
Aamma uranimik, ulorianartunillu qinngornilittalinnik nunatsinni piiaasoqassanersoq taakkuninngalu avammut niuertoqassanersoq innuttaasunik Naalakkersuisut taasititsinissaannik Inuit Ataqatigiit Inatsisartuni gruppia siunnersuuteqarpoq.
Inatsisartut upernaakkut ataatsimiilerpata oqaluuserisassaat ilaatigut tamakkuupput.
Upernaakkut ataatsimiinneq aprilip arfineq pingajuani aallartissaaq.
