Politikki

Akitsuutit assortuussutaasut nunatta karsianut ima iluanaarutaatigipput

Sunoorsinut, sukkuluunut qummoroortartunullu akitsuut nutaaq oqallisigineqaqisoq, Nunatta karsianut qaammatit pingasut ingerlaneranni, tassa aggustimit novembarimut millionilikkaanik isertitsissutaapput.

Allattoq Inge S. Rasmussen

februaarip 12-at 2016 07:20

Nutserisoq Mads Lynge

Kisitsisit saqqummiunneqartut takutippaat, nioqqutissanut qulaani taaneqartunut akitsuutit, Nunatta karsianut 8.238.193 koruuninik isertitsissutaasimasut.

Aningaasaqarnermut naalakkersuisup Randi Vestergaard Evaldsenip, Steen Lyngep, Atassummeersup, § 37 naapertorlugu apeqquteqaataanut akissutaani tamanna atuarneqarsinnaavoq.

Aamma atuaruk Vittus: mamakujuttunut akitsuummut aaqqiissuteqartoqangajalerpoq

Inatsit Inatsisartuni novembarip ulluisa 17-ianni akuersissutigineqarpoq, kingumullu atuuttussatut akuersissutigineqarpoq, aggustip ulluisa 20-annit atuuttussatut akuersissutigineqarluni, inatsisissatummi siunnersuut, ulloq taanna siullerpaamik saqqummiuneqarami.

Aamma atuaruk Aningaasaqarnermut ataatsimiititaliap Naalakkersuisut isornartorsiorai

Siunnersuut oqallisigineqangaatsiarpoq, siunnersuutillu atuutilernissaanut periaaserineqartut ullullu atuutilerfissap aalajangersarneqarnera isornartorsiorneqangaatsiarlutik.

Akitsuutit nutaat qulaani pineqartut suliffiutilinnut nammakkiisimasut, Steen Lyngep, § 37 naapertorlugu apeqquteqaateqarnermini tunngavilersuutigaa.

Aamma atuaruk Amerlanerussuteqartut akitsuutit akerleraat