Amerlanerussuteqartut akitsuutit akerleraat

Naalakkersuisut uuliamik, benzinamik, petruuliumik, mamakujunnik, sunoorsinik neqinillu Nunatta avataaneersunik akitsuusiinissamik siunnersuutaat Inatsisartuni amerlanerussuteqarluartut akerlerigaat aviisimi allaaserineqarpoq.
Nunatta karsiata imassaaleqeqisup qanoq immerneqarsinnaanissaanut siunnersuutit amerlagisassaanngillat. Politikerilli akitsuutinut naaggaarniartut imaaginnavipput.

Siumukkormiut arlallit naaggaarput. Laura Taunâjik, Suka K. Frederiksen, Jess Svane, Ineqi Kielsen, Nikolaj Jeremiassen aamma Vivian Motzfeldt akit qaffasereeqisut isumaqarput.

Partiit naalakkersuisoqataasut Demokraatit aamma Atassut akitsuusersuinissanut aamma isornartorsiuipput.

Aningaasat isertinneqartussatut pisariaqartinneqartut, allanit nassaarineqartariaqartut Demokraatit ilaatigut oqaatigaat.

Parti Naleqqameersup Anthon Frederiksenip qummoroortartut kisimik akitsuuserneqarnissaat akuerisinnaanerarpaa, aatsaallu pisariaqassappat mamakujuit akitsuutaasa qaffanneqarnissaat akuerisinnaallugu. Per Rosing-Petersenip sunoorsit qummoroortartullu akitsuuserneqarnissaat ajorinngilaa, partiilli siulittaasuata Hans Enoksenip akitsuusiiniarnerit tamaasa akerlerai.

Akit qaffasereeqaat. Taamaattumik Naalakkersuisut siunnersuutaat tapersersunngilakka, Hans Enoksen aviisimut oqarpoq. Inuit Ataqatigiit siunnersuutigineqartut tamaasa aamma akuersaarnianngikkaat, taamaattorli mamakujuit tupallu oqalliseqataaffigerusukkaat, Sermitsiami allaaserineqarpoq.

Aningaasalli sumit pissarsiarineqassanersut suli nalorninarpoq. Aaqqissuusseqqittoqarnissaanik pisariaqartitsisoqarnera Aningaasaqarnermut Siunnersuisoqatigiit ukiuni arlalinni tikkuartortarpaat. Taamatulli pisariaqartitsisoqarnera politikerinit maannamut kinguartiinnarneqartarpoq.