IA: Attaviitsup tusarneqarnissani amigaatigaa
Inuit Ataqatigiit ataatsimoortumik tapiissutit 10 millionit koruuninik ilanngarneqassasut ukiortaami siunnersuuteqarmata, naak piffissami tassani aninngaasaqarnermut oqaaseqartuugaluarluni siunnersuummut ilanngunneqarsimanani, Naaja Nathanielsen isumaqarpoq.
- Siunnersuut saqqummiunneqartinnagu oqaloqatigiinnerni oqallinnermiluunniit peqataanikuunngilanga, Naaja Nathanielsen oqarpoq.
Taannalu Inatsisartut upernaakkut ataatsimiinnisaanni oqaluuserisassani aalajangiisuusussani Naaja Nathanielsenip illersorsinnaanngisaanut ilaavoq.
Aamma qimaasunik nunatsinniitsitsinissanut tunngaluartoq taamaappoq.
- Apeqquteqaat tunngavigalugu oqallinneq tassaavoq partiinut allanut misiliineq, oqarluni: takusiuk uagut imaaliorusuppugut allalli taamaaliorusunngillat. Apeqquteqaat tunngavigalugu oqallitsitsiinnarnissaq uanni naammanngilaq, aamma partiip poltikkerisariaqaraluagaanut naapertuutinngilaq. Tassalu nunarsuarmioqatigiit iliuuseqarfigariaqagaanik qimaasorpassuaqarnerani, ikittunnnguanilluunniit nunatsinniititaqarnissatsinnut nukissaqarluta erseqqissumik nulunaarsinnaasariaqartugut, Naaja Nathanielsen oqarpoq.
Naaja Nathanielsen Inatsisartunut 2009-imi qinigaareernerminiilli partii assigiinngissutsinik inissaqartitsisutut isigisimavaa, tamannali piffissap ingerlanerani allanngorsimasoq, maanna isumaqarpoq.
- Partii IA manna tikillugu assigiinngitsunik isumaqarfiusinnaasutut misigaara. Aammali isummama paasitinnissaat ajornakusoortoq paasisariaqalersimavara, tamannalu tunuarninnik kinguneqarpoq, Naaja Nathanielsen oqarpoq.
Radioaviisip partiip siulittaasua Sara Olsvig oqaaseqartinniarsimagaluarpaa.
