Randi V. Evaldsen: Marloriarluni akileraartoqarnavianngilaq

Inuit tamakku ilaat nunanut allanut, ingammillu Danmarkimut, nuuttarput. Taamaalilluni Danmarkip akileraarutinut isertitat iluanaarutigisarpai. Tamannalu ima siunnersuuteqarnissigut unitsinniarparsi. Randi Vestergaard Evaldsen qanormi ilillusi eqqanaarsinnaavisiuk innuttaasut danskit soraarnerussutisianut akilersuiffiinut akilersuisut marloriaammik akileraaruserneqannginnissaat?

- Tassa uumap suliap suliarilluarneqarnissaa qulakkeerniarlugu kattuffiit aammalu soraarnerusutisiaqarnissamut aaqqissuussisut, ilaatigut suliaq peqqissaartumik piareersarneqarsimavoq taakku suleqatigalugit. Siunnersuullu aamma Kalaallit Nunaanni aningaasaqarnerup atasinnaasumik ineriartornissaanut annertuumik pingaaruteqarluinnartutut isigivarput.

- Taakku saniatigut akileraartarnermut atugarissaarnermullu ataatsimiititaliap aamma 2011-mi nalunaarusiaani siunnersuut imaluunniit isumassarsiaq saqqummiunneqaqqaarpoq. Oqallinnermi oqaatigineqartutuut aningaasat inatsimmi amigartoorutinik matussusiiniarluni isumassarsiaanngilaq.

Aamma atuaruk Soraarnerussutisiassat ikinnerulernissaat ernummatigineqartoq

- Tunngaviusutullu aamma naalakkersuisut isumaqarput eqqortuusinnanngitsoq Kalaallit Nunaanni ilanngaassiiffigineqartarneq uatsinnut aningaasartuutaassasoq kisiannili soraarnerussutisiaqarnissamut akiliinernut atatillugu akileraarneq nunani allani soraarninngorfinni pisartoq  naliginnaasumik soorlu Danmarkimi.

- Taamaattumik aamma naqissusissavarput naalakkersuisuninngaanniit uku akileraarutit qaffanniarlugit siunertaqannginnatta.

Aap, kisiannimi qanoq ilillusi eqqanaarsinnaavisiuk innuttaasut Kalaallit Nunaanni Danmarkimilu akileraannginnissaat?

- Tassa taanna uani inatsisitigut isumannaarneqassaaq. Soorunalimi inuit taamannak eqqorneqartussaanngillat kisiat naliginnaasuuvoq, aamma eqqarsartariaatsitsinni naliginnaasuusussaavoq, aningaasat isaatinneqartut soorunalimi aamma nunatsinni tunniunneqartarnissaat.

Aamma atuaruk Soraarnerussutisiaqalernissamut anguniagaq Nathanielsenip isornartorsiorpaa

- Kisiat soorunalimi uani aamma isumannaarneqareerpoq marloriarluni taamannak skateertoqassanngitsoq (akileraartoqassanngitsoq, aaqq.). Maanngaanniit pisortaqarfimminngaanniit aamma ilisimavarput taamaammallu aamma oplysningskampagnenik taallugu piareersarluta.

Taava taamaalillusi eqqanaassavarsi innuttaasut nunatsinni Danmarkimilu akileraannginnissaat, aat?

- Taanna iluarsineqareerpoq. Marloriarluni skateertoqarnavianngilaq (akileraartoqarnavianngilaq, aaqq.).

Naaja Nathanielsenip siunnersuut isornartorsiorpaa, tassami akileraajaarnerup maanna nunatta karsiata isertitsissutigissavaa kisianni aningaasat kignusinnerusukkut amigaatigineqalertussaapput, taama isornartorsiuineq illit qanoq oqaasissaqarfigiviuk?

- Tassa aatsaannguaq oqaatigisattuut una suliaq qangali ingerlaalereerpoq. Aamma tupinnarluinnarpoq taamannak politikeriminngaanniit oqartoqartillugu aningaasat soorunalimi maani isertinneqartut aammalu nunatsinniittussat soorunalimi aamma nunatsinni skateerutigineqartussaapput (akileraarutigineqartussaapput, aaqq.).

Aamma atuaruk Soraarnerussutisiassanik ileqqaagaqarnermut akiliutit Naalakkersuisut akileraaruserniaraat

- Massakkut imatut isikkoqartillugu taakku aningaasat toqqaannaq Danmarkimut nakkartarput, uku pensioneriarlutik (soraarninngoriartorlutik, aaqq.) Danmarkimukartartuni. Taanna eqqortuusinnaanngilaq aningaasat nunatsinniittussaapput, Aningaasaqarnermut naalakkersuisoq, Randi Vestergaard Evaldsen KNR-imut oqarpoq.