Socialdemokraatit siulittaasuat oqaluttuarisaaqatigiinnitsinni kukkusoqartarsimaneraavoq

- Ukiorpassuarni amerlasuunik ataatsimut misigisaqarnikuuvugut. Uanga danskisut, arnatut danskisullu politikeritut oqarusuppunga oqaluttuarisaaqatigiinnitsinni pisut tamaasa tulluusimaarutiginnginnakkit. Isumaqarpunga kukkusarpassuaqartugut. Ilaat ataatsimoorluta, ilaallu danskit tungaanniit. Naalagaaffeqatigiiunerpullu atorlugu kukkunerit taakku ilaat qaangerumaarigut neriuutigaara.

Nunat marluk oqaluttuarisaaneranni sorpiaat uggornartuunersut eqqaanngilaa. Sammisap itisilernissaa Socialdemokraatit tusagassiiviata KNR-imut mailikkut itigartitsissutigaa.

Partiilli siulittaasuata naalagaaffeqatigiinneq attatiinnarusullugu erseqqissaatigaa. Ajornanngippalli allannguuteqartillugu, Kalaallit Nunaat Savalimmiullu peqataanermi naleqarnerusutut isigilernerannik kinguneqartumik.

AAMMA ATUARUK Kalaallit Nunaata naalagaaffiinngornissaa Mette Frederiksenip tapersersorpaa

- Naalagaaffeqatigiinnermik tapersersuingaatsiartuuvunga, naalagaaffeqatigiinnerli betonngitut allanngugassaanngitsutut isiginngilara. Nunaavugut pingasut, inuiaat pingasut erfalasullu pingasut (...). Naalagaaffeqatigiinnerullu uummaarissuulluni nukittunissaanut nunat pingasut ilaasut tamarmik naalagaaffeqatigiinnerup ineriartortinnerani peqataasutut imminnut isigisinnaanissaat piumasaqaataavoq, Mette Frederiksen KNR-imut oqarpoq.

Nuimasut ilaasa, ilaatigut Bertel Haarderip Venstremiit aamma danskit naalakkersuisuisa nunanut allanut tunngasunut misissuisittagarisimasaata Peter Taksøe-Jensenip naalagaaffeqatigiinnerup ilusilersugaanera iluarsaanneqartariaqartoq upernaap ingerlanerani siunnersuutigaat.

AAMMA ATUARUK Naalagaaffeqatigiineq pillugu nutaamik isumaqatigiissusiortoqarli