Aki-Matilda Høegh-Dam: Socialdemokraatit naalakkersuisunngortitsinissamut isumaqatigiissutaat naammagisimaaraa

Danmarkimi partiit saamerliit naalakkersuisunngortitsinissamut toqqammavissatut isumaqatigiissutaanni naalagaaffeqatigiiit titarnerit marluk sinnilaaginnarlugit eqqaaneqarnerat Folketingimut qinigaarlaap Siumumeersup Aki-Matilda Høegh-Damip naammagisimaarpaa.
Siumumeersup Aki-Matilda Høegh-Damip isumaqatigiissummi nunatsinnut naalagaaffeqatigiinnullu tunngasut naammagisimaarpai. Assi © : Paalu Møller
juunip 26-at 2019 10:33
Nutserisoq Simon Uldum

Atsioqatigiissutigineqartumi 18-inik qupperneqartumi Naalagaaffeqatigiinneq titarnerit marluk sinnilaaginnarlugit eqqaaneqarpoq.

Taamaakkaluartoq, Folketingimut qinigaarlaap, Siumumeersup Aki-Matilda Høegh-Damip Mette Frederiksen ministeriunertut siuttoralugu naalakkersuisunngortitsinissamut suleqatigiinnissamik isumaqatigiissummi naalagaaffeqatigiinneq pillugu oqaatigineqartut nuannaarutigai.

AAMMA ATUARUK Naalakkersuisunngortitsiniarluni isumaqatigiinniarnerit pileruttorput

- Oqaloqatigiissutigisagut ilaapput. Pingaarnersiuisoqaannarneranik soorunami oqartoqarsinnaavoq. Isumaqarpungali Danmarkip (nunatsinni, aaqq.) akisussaaffeqatigisaata ineriartortinnissaannik oqarneq tigussaasupilussuusoq, tamannaavorlumi uanga pingaartillugu sulissutigerusutara. Taamaammat tamanna nuannaarutigisupilussuuara, Aki-Matilda Høegh-Dam oqarpoq.

Isumaqatigiissummi qupperneq 2-mi ima allassimasoqarpoq: 

- Danmark Naalagaaffeqatigiinnut aamma ilaavoq. Naalakkersuisunngortut Naalagaaffeqatigiinni tatigeqatigiinneq ataqqeqatigiinnerlu tunngavigalugit naligiimmik, pitsaasumik nukittunerusumillu suleqatigiittoqarnissaa kissaatigaat. Kalaallit Nunaat Savalimmiullu peqatigalugit Danmarkip akisussaaffeqarfigisai ineriartortissavagut .

Isumaqatigiissut tamakkerlugu uani atuarneqarsinnaavoq:

AAMMA ATUARUK Mette Frederiksen meeqqat misileraatigineqartut utoqqatserfiginiarlugit neriorsuisoq

Assersuusiussagaannilu, Danmarkimi naalakkersuisut siuliisa Lars Løkke Rasmussenimit siuttuuffigineqartut isumaqatigiissutaanni naalagaaffeqatigiinneq A4-p affaa sinnilaarlugu allaaserineqarpoq.

Siumup qinersinissaq sioqqullugu neriorsuutigaa Socialdemokraatit naalakkersuisunngortitsinissaat tapersersorniarlugu. Aamma isumaqatigiinniarnerni Siumut Inuit Ataqatigiillu oqaasertalersuinerup peqataaffiginissaanut periarfissinneqarput.

S: Danmarkip akissussaaffia naqissusissallugu pingaarpoq

Nunatsinni suliassaqarfiit 32-t danskit naalagaaffiata politikkikkut aningaasatigullu akisussaaffigisaata Folketingimi amerlanerussuteqartunit ineriartortinneqarniarnerat Aki-Matilda Høegh-Damip immikkut maluginiarpaa.

- Soorunami pissusissamisuuginnaraluarpoq, siornatigulli naalakkersuisuusarsimasut akisussaaffeqarfimminnik ineriartortitsinissartik pissusissamisoortittuaannarsimanngilaat. Namminersorneq pillugu inatsimmi allaqqaannarani maanna aamma isumaqatigiissummi matumani allaqqalerpoq, naligiimmik, pitsaasumik nukittorsakkamillu suleqatigiissasugut. Tamannalu qanorluunniit avaqqunneqarsinnaajunnaarpoq.

AAMMA ATUARUK Akissarsiat assigiinnginnerannik nalunaarusiaq ukiup affaanik kinguaattooqqasoq

Naalakkersuisut nutaat politikkikkut suleqatiginissaannut toqqammavissatut pitsaasutut aamma isigaa.

Siullertullu sulissutiginiagai tassaapput nunatta nunanut allanut politikkikkut kiffaanngissuseqarnerulernissaa, politiit inissiisarfinnilu paarsisut naligiimmik akissaasersorneqarnissaat aamma nunatsinni meeqqat inuusuttullu ikiortariallit pitsaanerusunik atugassaqartinnissaat.