Naalakkersuisunngortitsiniarluni isumaqatigiinniarnerit pileruttorput
Venstremeersut, Danmarkimi ullaaq manna nalunaaqutaq malillugu qulingiluanngortoq, partiini siullersaallutik Christiansborgimi inimut isumaqatigiinniarfiusumut iserput.
Partiillu tamarmik aallarniutaasumik oqaloqatigiinnernut ullup ingerlanerani aamma aggersarneqarput. Savalimmiuniillu qinikkat Sambandspartiimeersoq Javnaðarflokkurinimeersorlu ualeq manna oqaloqatigineqassapput, nunatsinneersullu Inuit Ataqatigiit Siumumullu sapaatit akunnerata naanerata ingerlanerani oqaloqatigineqassallutik.
Socialdemokraatit tusagassiisarfiat KNR-imut taama ilisimatitsivoq.
AAMMA ATUARUK Qinikkat nunatsinneersut isumaqatigiinniarnissamut pilersaarusioqatigiinniartut
Aki-Mathilda Høegh-Damip Aaja Chemnitz Larsenillu Socialdemokraatit siulittaasuannut Mette Frederiksenimut isumaqatigiinniarnissamut siunnersuutissatik isumaqatigiissutiginiarlugit sisamanngormat ataatsimiipput.
Socialdemokraatit kisimiillutik naalakkersuisunngortitsinissartik siunniuteqqavaat, Folketingimili amerlanerussuteqartunik tunuliaqutaqassagunik partiit saamerliit tamaasa imaluunniit Venstre pisariaqartippaat.
Naalakkersuisunngortitsiniarnerlu sivisoratarsinnaavoq. Mette Frederiksenimi Danmarkimi tusagassiortunut oqaatigaa aasaanerani sulinngiffeqarnissaminut pilersaarusiorsimanani.
AAMMA ATUARUK Lars Løkke Rasmussen dronningimut inuulluaqqusiartortoq