Assi: KNR/ANNA P. KNUDSEN

Qinikkat nunatsinneersut isumaqatigiinniarnissamut pilersaarusioqatigiinniartut

Folketingimut qinigaasut, Aki-Mathilda Høegh-Dam aamma Aaja Chemnitz Larsen, Socialdemokraatit ataatsimeeqatiginissaannut pilersaarusioqatigiillutik ualimut ataatsimiissapput.

Nunatsinnit Folketingimut qinikkat ukiunut kingullernut sisamanut naleqqiullugu annertunerungaatsiartumik suleqatigiinniarput.

Inuit Ataqatigiinneersup Aaja Chemnitz Larsenip qineqqusaartoqarnerani tamanna ujartorpaa. Aamma qinigaarlaap Siumumeersup Aki-Mathilda Høegh-Damip tamanna naqissuserpaa.

AAMMA ATUARUK Mette Frederiksenimut kissaatigisani nassiutereerai

Taamaammat suleqatigiligassanilu pilersaarusioqatigiinniarlutik sisamanngornermi ualikkut ataatsimiinniarput, KNR-imut taama paasissutissiivoq.

- Aamma iluamik suleqatigiissagutta pingaaruteqarami oqaasinngueqatigiissinnaaneq aamma nunatsinninngaanniit aallaqqaammut Danmarkimukannginnitsinni, sukumiinerusumillu isumaqatiginninniaqatigiilluta, Aki-Mathilda Høegh-Dam oqarpoq.

Naligiimmik akissarsiaqarneq aamma isumaginninnermut eqqartuussiveqarnermullu suliassaqarfiit

Siumup Socialdemokraatit siulittaasuat Mette Frederiksen ministeriunertut toqqarniarlugu siumoortumik nalunaarutigereerpaa. Aki-Mathilda Høegh-Damilu naapertorlugu Siumup Socialdemokraatillu akornanni qinersineq sioqqullugu isumaqatigiinniartoqareerpoq.

Inuit Ataqatigiillu qinersinerup kingorna isumaqatigiinniarnerit apeqqutaatinniarlugit oqaatigaat. Aaja Chemnitz Larsenilli isumaqatigiinniarnissamut siunnersuutinik Mette Frederiksenimut nassiussisimavoq.

AAMMA ATUARUK Lars Løkke Rasmussen dronningimut inuulluaqqusiartortoq

Folketingimili amerlanerussuteqarnissamut Atlantikup avannaani qinikkat aalajangiisuunissaannut qinersinerup inernera periarfissaqartitsivallaanngilaq.

Taamaakkaluartoq Mette Frederiksenip nunatsinnit tapersersorneqarnissani ilungersuutigisariaqassavaa, Aki-Mathilda Høegh-Dam taama oqarpoq.

- Uagut isertuutinngilarput Socialdemokratietilu qangali isumaqatigiinninniarnikuulluta. Taamaakkaluartorli aamma pingaaruteqarsoraara aamma partiit allat tusarniaaviginissaat, tassami politikki aamma taamatut ingerlasarmat.

Siumup Mette Frederiksenimut pingaarnertut piumasaqaatigisai tassaapput politiit inissiisarfinnilu paarsisut kalaallit danskillu assigiimmik akissarsiaqartinnissaat aammalu isumaginninnikkut suliassaqarfimmi Danmarkimit ikiorneqarnissaq.

Aaja Chemnitz Larsenip isumaqatigiinniarnerni tamakku aamma salliutinniarlugit oqaatigisimavaa.

AAMMA ATUARUK Debutanten og den erfarne: Hvor er det fedt!

 

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput