Aaja Chemnitz Larsen Mette Frederiksenimut kissaatigisani nassiutereerai
Oqaasissaqartitaarusukkaanni aamma peqataanissaq pisariaqarpoq.
Inuit Ataqatigiinneersoq Aaja Chemnitz Larsen Folketingimut pingasunngornermi qinigaaqqittoq taama anguniagaqarpoq.
Socialdemokraatillu Mette Frederiksen siuttoralugu naalakkersuisunngortitsiniarnissaannut isumaqatigiinniutissatut Inuit Ataqatigiit kissaatigisaanik nassiussaqareersimavoq. KNR-ip qinersineq pillugu pingasunngormat unnukkut aallakaatitsinerani taama oqarpoq.
AAMMA ATUARUK Aki Mathilda Høegh Dam aamma Aaja Chemnitz Larsen Folketingimut qinigaapput
Pingaartumillu Folketingimi ataatsimiititaliani amerlanerusuni ilaasortaaffeqarnissaq pineqarpoq.
- Kalaallit Nunaannut tunngasunut ataatsimiititaliaq Folketingimi ataatsimiititaliarpassuit ilagiinnarpaat. Nunanut allanut tunngasunut politikkikkut aalajangiisartoqatigiit, Illersornissaq pillugu ataatsimiititaliaq, Eqqartuussiveqarneq pillugu ataatsimiititaliaq… Isumaqatigiinniarnissamut siunnersuutinik Mette Frederiksenimut nassiussereerpunga oqarlunga: Uku Kalaallit Nunaannut pingaaruteqartupilussuupput, Aaja Chemnitz Larsen oqarpoq.
Ataatsimiititaliat pissaaneqartupilussuupput
Sorpassuimmi Folketingip ataatsimiittarfiani taasissutigineqannginnerini politikkikkut ataatsimiititaliani aalajangiiffigineqareertarput.
Aaja Chemnitz Larsenilli Kalaallit Nunaannut tunngasunut ataatsimiititaliaq kisiat qinigaaffiup siuliani aalajangersimasumik ilaasortaaffigaa, aammali Nunanut allanut tunngasunut politikkikkut aalajangiisartoqatigiinni ilaasortaavoq, Europarådimilu aamma Nunat avannarliit siunnersuisoqatigiivini sinniisuulluni.
AAMMA ATUARUK Debutanten og den erfarne: Hvor er det fedt!
Aleqa Hammond Kalaallit Nunaannut tunngasunut ataatsimiititaliamiinnaq aalajangersimasumik ilaasortaavoq Nunallu avannarliit siunnersuisoqatigiivini sinniisuulluni.
Qinikkalli nunatsinneersut ataatsimiititaliani amerlanerusuni aalajangersimasumik ilaasortaasariaqaraluarput, Aaja Chemnitz Larsen taama isumaqarpoq.
- Qinikkat marluusut siunissaq eqqarsaatigalugu taama ilaasortaaffeqalernissaat neriuutigaara, nunatsinnumi tunngasunik pingaarutilippassuarnik aalajangiisoqartarpoq, taakkulu soorunami peqataaffigisariaqarpagut.
Qinigaarlaallu Siumumeersup Aki-Mathilda Høegh-Damip nammineq Aaja Chemnitz Larsenilu Folketingimi ataatsimiititaliani amerlanerusuni ilaasortaaffeqarnissartik isumaqataaffigaa, Kalaallit Nunaannut tunngasunut ataatsimiititaliami siulittaasuuffik ilanngullugu.
- Pingaaruteqartupilussuuvoq, aamma kalaallimit inuttaqarnissaa pissusissamisoorpoq. Aamma aallaqqaataanilli taamaassimannginnera tupinnarpoq.
Siumup Mette Frederiksen ministeriunertut tapersersorniarlugu siumoortumik nalunaarutigereerpaa.
AAMMA ATUARUK Kalaallimik pisivugut
2015-imi Folketingimut qinersisoqarnerup kingorna Venstrep Kalaallit Nunaannut tunngasunut ataatsimiititaliaq siulittaasuuffigilerpaa, naak ileqquusoq malillugu nunatsinneersumik siulittaasunngortitsisoqartaraluartoq.
Aleqa Hammondili Aaja Chemnitz Larsenili siulittaasunngortinneqanngillat. Ataatsimiititalianilu ilaasortaaffiit isumaqatigiinniutigineqarmata nunatsinneersumik siulittaasunngortitsinissaq Socialdemokraatinit sulissutigineqanngilaq.
Aatsaallu 2017-imi Aleqa Hammond Kalaallit Nunaannut tunngasunut ataatsimiititaliami siulittaasunngortinneqarpoq, Løkkep naalakkersuisuinik uppisitsinnginnissamik neriorsuisinneqarluni.