Qinigaarngaaq misilittagalillu: Pikkunarlunilu killitsinnaq
Aki-Matilda Høegh-Damip nunarput sinnerlugu Folketingimut qinigaanini qularnaarmat killitsisimaqaluni ima qisuariarpoq.
- Pikkunaq. Misigisimavunga soorlu sinnattorlunga soorlu suli iluamik pulanngitsoq. Kisianni aamma tanngassimaarutigaara ilumut tassunga killissinnaagama. Upperineqarnera tatiginnittorpassuillu nukittorsaatigisimaqaakka aamma maani qineqqusaarninni, Aki-Matilda Høegh-Dam oqarpoq nangillunilu
- Ullut ilaanni nikalloraluaruma, ajukkutilissagaluaruma, misigisimaleraluarumaluunniit alloriaqqissinnaananga tapersersortikka nukittoqqutigissavakka. Tunuliaqutikka, sorlaqarfikka puiornavianngilakka suliartoruma Danmarkimut. Qujanarujussuaq qamannga pisumik
Aki-Matilda Høegh-Dam 3.467-init qinerneqarpoq.
Aki-Matilda Høegh-Dam 22-nik ukioqarpoq.
Ilinniagaq/suliffik: Naalagaafiit pissusaannik ilisimatusarnermi bachelorinngorniaq.
Socialdemokraatit siulittaasuat Mette Frederiksen statsministeritut tapersersorpaa.
Aaja Chemnitz Larsen 41-nik ukioqarpoq.
Cand.scient.adm.
Statsminiterinngortussamik taaserusunngilaq.
Aki-Matilda Høegh-Damip Folketingimi ukiuni tulliuttuni sisamani suleqatissaa sulinermi misilittagaqareerpoq. Aaja Chemnitz Larsenip qinigaaqqinnini qulakkeeramiuk killitsisimaqaluni ima oqarpoq:
- Killitsinnaqaaq. Qujanarujussuaq, Nuummuinnaanngitsoq Kalaallit Nunaata sinneranullu. Uannut qinersisut tamaasa qutsavigaakka. Kalaaliuvunga danskisut oqaasilik, taanna pissutaalluni immikkoortinneqartutut eqqunngitsutulluunniit misigisimanarsinnaasarpoq. Pisulli takutippaa Kalaallit Nunaanni kikkut tamarmik inissaqartut danskisut oqaaseqartuugaluanulluunniit, Aaja Chemnitz Larsen oqarpoq.
Aaja Chemnitz Larsen 5.686-inik qinerneqarpoq, katillugit 23,4-nit qinerneqarluni.
