Akissarsiat assigiinnginnerannik nalunaarusiaq ukiup affaanik kinguaattooqqasoq
- Qulaajaanerup piareersimanissaa naatsorsuutigissallugu soorunami pissutissaqarpoq, Danmarkimi Politiit Kattuffiata siulittaasua, Claus Oxfeldt oqarpoq.
Taassuma Kalaallit Nunaanni Politiit Peqatigiiffiat Pinerluuteqarsimasunillu isumaginnittoqarfik assigalugit nalunaarut maannamut qaammatinik arfineq-marlunnik kinguaattoorutaasoq utaqqivaa.
AAMMA ATUARUK Akissarsiat qaffanneqartariaqarput
Nalunaarut inatsiseqarnermut ministerip, Søren Pape Poulsenip (K) 2017-imi suliakkiissutigaa, tassanilu Nunatsinni Danmarkimilu politiit pinerluuteqarsimasunullu inissiisarfimmi betjentit suliffeqarnerminni atugaasa assigiinngissusaat sanilliunneqassapput.
Naak naalagaaffik danskinut kalaallinullu politiinut pinerluuteqarsimasunullu inissiisarfinni sulisunut tamanut sulisitsisuugaluartoq taakku assigiinngitsumik isumaqatigiissuteqarfigineqarnerat qasseeriarluni isornartorsiorneqareersorlu taama nalunaarusiortitsisoqarpoq.
Akissarsiat assigiinnginnerat naalakkersuisunngorniarnermi isumaqatigiinniarnermi ilaasoq
Nalunaarusiarli 2018-ip naannginneranili naammassereertussaagaluartoq suli piariinngilaq.
- Qulaajaaneq suli naammassineqanngilaq, tamannalu pissutigalugu suliamut tassunga piffissami matumani nutaarsiassaqanngilaq, Inatsiseqarnermut ministereqarfik maajip aappaanni KNR-imut mailikkut allappoq, juunillu 25-anni nalunaarutaa taamaaginnarpoq.
AAMMA ATUARUK Naalakkersuisunngortitsiniarluni isumaqatigiinniarnerit pileruttorput
Siumut Inuit Ataqatigiillu akissarsiat assigiinnginnerat Danmarkimi nutaamik naalakkersuisoqalernissamut isumaqatigiinniarnermi tamarmik qaqippaat.
- Kalaaleq danskerlu Kalaallit Nunaanni suleqatigiikkaagamik kalaaleq danskimit aningaasarsiakinnerusarpoq. Allatut inuiaassuseqarnermut tamanna assigiinngisitsinerulluinnarpoq, Aki-Mathilda Høegh-Dam Jyllands-Postenimut oqarpoq.
Assigiinnginnerat nalilerneqarsinnaanngitsoq
Danmarkimi Politiit Kattuffianiit Claus Oxfeldtip kalaallit danskillu betjentit akornanni akissarsiatigut assigiinngittoqarneraaneq itigartitsissutigaa. Kalaallimmi betjentip akissarsiaanni tapeqarpoq taannalu akissarsiatigut assigiinngissutaasimasumut aaqqiissutaavoq.
Danmarkimilu betjentit politeeqarfinni assigiinngitsuniittut assigiinngitsumik akissarsiaqarnerat aamma erseqqissaatigaa.
- Politiitta akornanni assigiissaartumik akissarsiaqartitsisoqanngilaq. Københavnimi politeeq Aalborgimi Esbergimiluunniit politiitut akissarsiaqanngilaq. Taamaammat Danmarkimi aamma assigiinngittoqarpoq, Claus Oxfeldt oqarpoq.
AAMMA ATUARUK Akissarsiat assigiinngissutaat politiit kattuffianni siulittaasup misissuiffiginiaraa
Tamatumalu saniatigut kalaallit danskillu suliffeqarneranni sapaatip akunneranut sulisarnerit, sulinngiffeqarnerit, akeqanngitsumik angalanerit ernisoqareernermilu sulinngiffeqarnerit malittarisassartaat aamma assigiinngitsorujussuupput.
Taamaammat pissutsit sinileriisinniassallugit ajornakusoortoq Claus Oxfeldtip paasisinnaavaa. Taamaakkaluartorli Kalaallit Nunaanni Politiit Peqatigiiffiata assigiimmik akissarsiaqartitsinissamut kissaateqarnera taperserpaa.
- Kalaallit danskillu politiivisa akornanni assigiiginnangajammik ilinniagaqarpugut, taamaammat assigiinngitsorpassuit assigeeqqissaamik isumaqatigiissuteqalernissatsinnut sanilliunneqarsinnaapput, taakkulu naalagaaffeqatigiinnermi assigeeqqissaarpata isumaqassasoraagut.
AAMMA ATUARUK Pinerluttunik isumaginnittoqarfik pillugu isumaqatigiissummi nunarput ilaatinneqanngilaq
Tamatuma saniatigut taamaliorneq pisariunnginnerussaqaaq. Tassami Danmarkimi politiit kattuffissuat ullumikkut Kalaallit Nunaanni atuuttussamik taavalu aamma allamik Danmarkimi atuuttussamik piffissani kipungasuni isumaqatigiissusiortarpoq.
- Tamaaliornarnerlu unammillernartuutipparput. Taava akissarsiat qaffaataasinaasut, piffissani kipungasuni pissavagut. Tamanna isumaqanngilaq, Claus Oxfeldt oqarpoq.
Naalakkersuisut nutaat, Mette Frederiksenimit siulittaasuuffigineqartut nalunaarummik naammassinnissanersut nalunarpoq.