Akissarsiat assigiinngissutaat politiit kattuffianni siulittaasup misissuiffiginiaraa

Naalagaaffeqatigiinni politiit assigiimmik akissarsiaqartinnissaannut qanoq iliortoqarsinnaaneranik misissuisoqarnissaa politiit kattuffianni siulittaasup nunatsinni tikeraarnermini neriorsuutigaa.
Allattoq Jonas Fievé
marsip 08-at 2018 06:55
Nutserisoq Simon Uldum -

Danmarkimi nunatsinnilu politiit assigiimmik akissarsiaqartinnissaat sulissutigineqassaaq. Politiit kattuffianni siulittaasoq, nunatsinni politiit ataatsimeeqatigiartorlugit maannakkorpiaq nunatsinniittoq taama oqarpoq.

- Isumaqarpunga ajornartorsiutaasoq pimoorulluinnartariaqaripput, Politiit kattuffianni siulittaasoq Claus Oxfeldt taama oqarpoq.

Siulittaasup nunatsinniinnermini politiit Nuummiittut nunallu sinneraneersut ataatsimeeqatigai, taakkulu tamarmik nunatsinni atorfeqarnermikkut ajornerusunik atugassaqartitaanertik naammaginagu oqaatigisimavaat. Politiit kattuffiata siulittaasuata tamanna paasilluarsinnaavaa.

AAMMA ATUARUK Politiip akissaatinut isumaqatigiissut nutaaq piluarigaa

Nunatsinni politiit paasisinnaalluarai

- Akissarsiat aamma Danmarkimi Kalaallit Nunaannilu pissutsit assigiinnginnerat naammagineqanngitsut maanngannginnitsinni ilisimareerparput. Taamali sakkortutiginera soorunami pimoorulluinnartariaqarparput, aamma taamaaliorpugut.

Nunatsinni politiini tjenestemandit Danmarkimi politiinut akissarsiatigut atorfeqarnikkullu atugassarititaasut assinginik tunineqarnissaat akissaatit pillugit isumaqatigiinniarnerni kingullerni Moderniseringsstyrelsimit itigartinneqarpoq, tamatuma kingunerissammagu politiit Namminersorlutik Oqartussani kommuninilu atorfilinnit sulinermi pitsaanerusunik atugassaqartinneqalernissaat.

AAMMA ATUARUK Assigiimmik akissarsiaqartitsinissaq politikerit qulakkeertariaqarpaat

2020-mut utaqqissunneqassanngitsoq

Aaqqiissutissamilli nunatsinni ilaasortami naammagisinnaasaannik nassaartoqarsinnaanissaa Claus Oxfeldtip neriuutiginerarpaa.

- Kalaallit Nunaanni suleqativut Danmarkimi suleqatitsitulli naleqartigipput, taamaammat soorunami sakkortuumik sunnertinnarpoq.Tamannalu sapinngisatsinnik aaqqiissuteqarfiginiassavarput, atugassaritinneqartut Kalaallit Nunaanni aamma naammaginartunngortikkumallugit.

Akissaatillu pillugit isumaqatigiissut 2020-p tungaanut atuukkaluartoq, politiit kattuffianni siulittaasup assigiinngissutaasup annertussusaa qanorlu aaqqiissuteqarfigineqarsinnaanera maannangaaq misissuiffiginiarpaa.

- Piffissamik sulinermut atorneqartumut tunngatillugu, aammali akissarsiaqartitsinermut tunngatillugu. Maannakkorpiarlu tamakku aaqqiissuteqarfigisinnaagutsigit isumaqanngilanga 2020-p tungaanut utaqqisoqartariaqartoq, Claus Oxfeldt taama oqarpoq.

AAMMA ATUARUK Isumaqatigiissutip assortuussutaanera Søren Papep akuliuffigerusunngikkaa

 

Aamma atuaruk