Politiip akissaatinut isumaqatigiissut nutaaq piluarigaa
Politiit nunatsinni ilinniarsimasut Danmarkimi politiinit suli akissarsiakinnerungaatsiarput. Isumaqatigiissulli naalagaaffiup sulisuinut oktobarip aallaqqaataani atuutilersussaq taama inerneqarpoq.
Kalaallit Politiivisa Peqatigiiffiani siulittaasup, Jesper Fleischerip isumaqatigiissut nutaaq tipaatsuutiginngilaa.
- Isumaqatigiissutertaarput soorunami iluarisimaarutigivallaanngilarput, KNR-imut oqarpoq.
AAMMA ATUARUK Assigiimmik akissarsiaqartitsinissaq politikerit qulakkeertariaqarpaat
Isumaqatigiinniangaatsiarneq – isumaqatigiissutertaqanngitsoq
Kalaallit politiivisa aningaasarsiaat isumaqatigiissut nutaat malillugu ukiuni tallimani 3,8 procentimik qaffassapput. Taakku saniatigut sulinngiffiup avataatigut suliartoqqusaanermi akisarsiassat qaffassallutik. Tamannali danskit politiivisa akissarsiaanniit suli appasinneruvoq.
Nunatsinnilu politiini atorfillit akissaatitigut inissisimaffimmi isumaqatigiissut nutaat malillugu qaffassallutik.
Isumaqatigiissut naalgaaffimmi sulisunut nunatsinniittunut tamanut atuuttussaq 2015-imi atuulertussaanikuugaluarpoq, isumaqatigiinngissuteqartoqarneratigulli isumaqatigiinniarnerit unittoorsimapput. Isumaqatigiinniarnerit ukiup ataatsip missaa uningatinneqareerlutik januaarip qaammataani ukioq manna aallarteqqinneqarput.
AAMMA ATUARUK Isumaqatigiissutip assortuussutaanera Søren Papep akuliuffigerusunngikkaa
Isumaqatigiissut danskit naalagaaffianni nutarterinermut aqutsisoqarfianut, siunnersuumminnik aalajangersimaannartunut isumaqatigiissutigineqarpoq. Suliamili suliffiup avataatigut suliartoqqusaanermi akissarsiassat danskit politiivisa kattuffiata tapersiineratigut taamaallaat nikeriarput. Isumaqatigiinnerilli nikippallannaanngitsut Jesper Fleischer isumaqarpoq.
- Angeraluarutta naaggaaraluaruttaluunniit apeqqutaanngilaq. Pinngitsuugassaanngitsumik tunineqarpugut.
Fleischerilli isumaqatigiissulli maanna akuerisassaasoraa. Naalagaaffimmi atorfilinnut tamanut akissaatinut aalajangersimasumik aningaasaqarnermut sinaakkuteqarpoq. Politiillu kattuffiat utaqqeqqissimagaluaruni akissaatit pillugit annikinnerusumik isumaqatigiissuteqalertoqarsinnaavoq.
- Maanna pissarsiatsinnit annertunerusumik pisinnaanissarput naatsorsuutigisinnaannginnatsigu, Jesper Fleischer oqarpoq.
Akissaatit pillugit isumaqatigiissut 2020-p tungaanut atuutissaaq.
