Politiit peqatigiiffiat: Assigiimmik akissarsiaqartitsinissaq politikerit qulakkeertariaqarpaat
Sulisitsisoq ataaseq, akisussaaffik ataaseq, akissaatitigut isumaqatigiissut ataaseq.
Nunatsinni politiit peqatigiiffiat danskit naalagaaffiannut akissaatit pillugit isumaqatigiinniarnerit maanna ukiuni marlunni ingerlanneqarsimasut pillugit taama oqariartuuteqarpoq.
Isumaqatigiinniarnerilli 2016-ip aallartinnerani unittoorutigineqarput ukioq mannalu aatsaat nangeqqinneqarlutik, Nunatsinni politiit peqatigiiffianni siulittaasoq, Jesper Fleischer, KNR-imut taama oqaluttuarpoq.
AAMMA ATUARUK Politiit aallaasitoqqatik atuinnassavaat
Naalagaaffiup Nunatsinni atorfeqaartitaanut akissarsianut sulinermullu atugassarititaasut pillugit isumaqatigiissut, ilaatigut politiinut atuuttussaq, Nunatsinni politiit peqatigiiffiata isumaqatigiinniartitaata Centralorganisationen CO10-p aamma Moderniseringsstyrelsip danskit naalagaaffiata ataaniittup isumaqatigiissutigisaat 2015-imi atuutilersinneqartussaagaluarpoq.
- Isumaqatigiinniarnerit januaarip aqqaneq-aappaani aallarteqqinneqarput, tamannalu sioqqullugu paasitinneqarpugut AK-p Namminersorlutillu Oqartussat akornanni isumaqatigiinniarnerit naammassineqarnissaat utaqqimaaqqaarniarlugit Moderniseringsstyrelsi kissaateqartoq, isumaqatigiinniarnerit taakku inernerat uagut isumaqatigiinniarnitsinnut tunngavissatut atussallugit kissaatigineqarmat.
POLITIIT AKISSARSIAAT
Politeeq - ilinniakkaminik Nunatsinni naammasserlaaq:
Ukiumut akissarsiat tunngaviusut: 210.641 kr.
Nalimmassaanermut tapisiat: 47.695 kr.
Nalimmassaanermut tapisiat najoqqutaralugit PFA Pensonimut 18 %: 8.585 kr.
Katillugit: 266.921 kr.
+ unnukkoornermut-, sapaammi sulinermut qaaqquneqarsinnaallunilu sillimanermut tapisiat akissarsiat tunngaviusut najoqqutaralugit naatsorsorneqartartut.
+ Kalaallit Nunaanni tjenestemanditut soraarnerussutisiat. Taakku Danmarkimi tjenestemandinut naleqqiullugit ikinnerupput.
Politeeq - ilinniakkaminik Danmarkimi naammasserlaaq:
Ukiumut akissarsiat tunngaviusut: 269.970 kr.
Nuttarnermut tapisit, ikinnerpaamik: 24.804,17 kr.
Katillugit: 294.774,17 kr.
+ unnukkoornermut-, sapaammi sulinermut qaaqquneqarsinnaallunilu sillimanermut tapisiat akissarsiat tunngaviusut najoqqutaralugit naatsorsorneqartartut.
+ Danmarkimi tjenestemanditut soraarnerussutisiat.
Najoqqutarisat: Kalaallit Nunaanni politiit peqatigiiffiat, Danmarks Politiforbund
Politiit assigiimmik akissarsiaqartinnissaat naalagaaffiup itigartitsissutigigaa
Isumaqatigiinniarnerit uninnganerannut pissutaasoq tassaavoq Nunatsinni naalagaaffiup suliffeqarfiutaani atorfillit allat akissaatitigut isumaqatigiissutaat 2016-imi qanoq inerneqassanersut Moderniseringsstyrelsip utaqqaqqaarusummagu.
Tamannalu aallaavigalugu Naalagaaffiup politiivisa ataanni politiit akissaatitigut ataatsimoorussamik isumaqatigiissuteqarfiginissaat Moderniseringsstyrelsip KNR-imut mailikkut allagaqarluni itigartippaa.
- Tamanna pisortat suliffeqarfiutaannut allanut, tassalu Namminersorlutik Oqartussat kommunillu suliffeqarfiutaannut oqimaaqatigiinnginnermik kinguneqassaaq. Taamaammat Kalaallit Nunaanni politiit (naalagaaffimmilu atorfillit allat) Danmarkimi atorfinnut taama ittunut akissarsiaritinneqartut atorfininnermilu atugassarititaasut assinginik tunineqarnissaat Moderniseringsstyrelsip itigartippaa.
Assigiimmik akissarsiaqartitsinissaq
Nunatsinni politiit peqatigiiffiata akissaatit pillugit isumaqatigiissummut nutaamut piumasaqaataa paatsuugassaanngilaq:
- Pingaarnertut piumaqaatigaarput Danmarkimi akissaatitigut isumaqatigiissutip uatsinnut atuuttunngortinneqarnissaa, taamaaliornikkut suleqatitta danskit akissarsiaasa assinginik akissarsiaqartussanngorluta, Jesper Fleischer oqarpoq nangillunilu:
- Taamatut eqqarsarneq pissusissamisuuginnarpoq. Suliffeqarfimmi ataatsimi atorfeqaraanni, assigiimmik suliaqarluni assigiimmillu akisussaaffeqarluni, taava uatsinnut pissusissamisuuginnarpoq Danmarkimi suleqatitta isumaqatigiissutaata assinganik tunineqarnissarput.
Politiit peqatigiiffiata siulittaasuata Nunatsinni Danmarkimilu politiinngorniartarnerup assigiinnerat erseqqissaatigaa. Nunatsinnili politiit sapaatit-akunnerannut akunnerni 40-ni sulisarput Danmarkimi akunnerni 37-ni sulisoqartartoq, aamma Naalagaaffiup Sinniisoqarfia eqqartuussiviillu sullinneqartarput, Danmarkimi politiit taamatut suliaqaratik.
Moderniseringsstyrelsilli pissutsit allatut isiginiarniarpai. Nunatsinni pisortani atorfillit nalinginnaasumik qanoq akissaasersugaanerat isiginiarneqarpoq. Aamma suliaqarfimmi tassani Danmarkimi pisortani atorfilinnut naleqqiullugu akissarsiat appasinnerupput.
Ministerit oqaloqatigiittariaqarput
Nunatsinni politiit akornanni akissarsiatigut assigiinngissutsit pillugit § 37 naapertorlugu apeqquteqaammut akissuteqarluni inatsisinik atuutitsinermut naalakkersuisoq Sara Olsvig Partii Naleqqameersumut Anthon Frederiksenimut allappoq danskit inatsisinik atuutsitsinermut ministeriat akissarsiat assigiinnginnerat pillugu oqaloqatiginiarlugu.
Tamannalu pisariaqartoq, Jesper Fleischer oqarpoq. Aamma politikerit suliffeqarnermi akissaatitigut isumaqatigiissutinut akuliuttannginnerat ileqquunngikkaluartoq.
- Nunatsinnimi politiit peqatigiiffiata pilersinneqarnerani Danmarkimi suleqatitta akissarsiaasa assinginik piumasaqaateqarnermit ukiut 56-it maanna qaangiussimalerput. Ukiullu 56-it ingerlareernerini isumaqarpunga politikkikkut suliassanngortinneqarnissaa piffissanngortoq, Jesper Fleischer taama oqarpoq.
Danmarkimi naalakkersuisooqatigiit tunngavissaanni allassimavoq, naalakkersuisut "Savalimmiuni Kalaallit Nunaannilu naalagaaffiup akisussaaffeqarfiini Savalimmiuni Kalaallit Nunaannilu pissutsit immikkoorutaasut najoqqutaralugit, Danmarkimi pissutsinut naapertuuttumik assigiissaarinissaq sulissutiginiarpaat."
Taamaakkaluartoq Jesper Fleischerip danskit naalakkersuisuisa oqaatigisaat isumalluarnartippallaanngilaa.
- Politiit kattuffiannit (Danmarkimi, aaqq.) maannamut tusakkakka isumallualersitsinngillat. Ajoraluartumik, siulittaasoq taama oqarpoq.
Isumaqatigiinniarnerit sisamanngorpat tulliani nangeqqinneqassapput.
