Qalerallit: Nuup kangerlua aqutsiveqarfinngortinneqarluni pisassiissuteqarfiulissaaq
WWF-ip Pinngortitaleriffiullu aalisapiluttarnerup annertussusaanut illersuutissatut ujartugaat, tassa Nuup Kangerluani qaleralittassiissuteqalernissaq piffissami sivisuumi suliarineqarsimasoq naammassineqangajalerpoq.
Tamanna Karl Kristian Krusep aalisarnermut naalakkersuisutut 2015-imi februaarip qaammataani siunnersuutigaa. Nuup Kangerluani aqutsiveqarfimmik pilersitsinissamik siunertalik tusarniaassutigineqartoq februaarip qaammataani 2017-imi ilaatigut ilisimatitsissutigineqarpoq.
AAMMA ATUARUK Nuup kangerluani qaleralinniarneq Krusep killilersorniaraa
Karl Kristian Krusep tamanna tusagassiortunik oktobarip qaammataani 2017-imi katersortitsinermi oqaluusereqqippaa, tamatumalu maanna piviusunngortinneqarnissaanut takussutissaqarpoq.
Naalakkersuisuni decembarip aqqarnani siorna ataatsimiinnermi ’Aalisarnermut Piniarnermullu Naalakkersuisup Nuup Kangerluani aqutsiveqarfimmik pilersitsinissamut piaartumik siunnersuusiornissaa’ aalajangiunneqarpoq.
Naalakkersuisoqarfimmi pisortaq Jørgen Isak Olsen naapertorlugu nalunaarut nutartigaq sapaatit akunneri arlaqanngitsut qaangiuppata naammassineqassaaq, tamatumanilu Nuup kangerlua Upernavik, Uummannaq aamma Ilulissat assingalugit immikkut aqutsiveqarfinngortinneqassaaq. Taamatuttaarlu immikkoortoq Kalaallit Nunaata Sinnera, Nuup ullumikkut ilaaffigisaa.
Nalunaarutip siulliup februaarimi siorna tusarniaassutigineqarneraniilli suliaq ingerlavoq.
- Teknikkimut tunngasut ilaat inissinneqassapput. Killeqarfiliussaq qanoq annertutigissava? Qanoq pisassiissuteqartoqartigissava? Nalunaarulli ullut 14-it qaangiuppata piareersimanissaa naatsorsuutigaarput, KNR-imut oqarpoq.
AAMMA ATUARUK Qaleralinniarnermi malittarisassat sukaterneqartariaqarput
Nalunaarut tusarniaassutigineqaqqissanersoq akisinnaanngilaa. Tamanna aalisarnermut immikkoortortaqarfiup nalunaarusiani tunniutereerpagu naalakkersuisoqarfiup isumaliutigissavaa.
Nuup Kangerluani 2009-mi qaleralinniartoqartalerpoq. Taamani 200 tonsit missaat ukiumut aalisarneqartarput, 2016-imilu qaleralittarineqartut 1400 tonsit sinneqalersimapput.
Pinngortitaleriffiup Nuuk Kangerluani pisassiissutit 500 tonsiunissaat inassutigaa. WWF-illu inassutigineqartoq taanna taperserpaa.
- Isumassarsiatsialaavoq, taamaalilluta kangerlummi aalisarnermik allanngujuitsitsissaagut, WWF-imi uumassusilerisoq, Kaare Winther Hansen oqarpoq.
Pinngortitaleriffik naapertorlugu Nuup Kangerluani qalerallit agguaqatigiissillugu angissusaat 2009-imi 60 centimeteriusimasoq, 2013-imi 52 centimeterimut apparpoq. Nalinginnaalersorli taanna qaleralittassiissuteqarnikkut allanngorteqqinneqarsinnaasoq Pinngortitaleriffimmit oqaatigineqarpoq.
- Aalisakkat anginerulersinnaanissaat periarfissinneqassaaq, Pinngortitaleriffiup immikkoortortaqarfiani pisortaq, Helle Siegstad oqarpoq.
