Nuup kangerluani qaleralinniarneq Krusep killilersorniaraa
Pinngortitaleriffiup Nuummilu Aalisartut Piniartullu Peqatigiiffiata, qaleraleqassutsip malunnaatilimmik annikillisimaneranik malugisaqarsimasut, kaammattuuteqarnerisigut tamanna pivoq.
Annertuumik aalisartoqarneratigut qalerallit nungorartarsinnaanerat aalisartunit aarleqqutigineqarpoq.
Nuup Kangerluani qaleralinniarneq 1980-ikkunni annertusivoq, 1985-imilu pisarineqartut oqaluttuarisaanermi annersaraat, taamani 2.100 tonsit pisarineqarsimallutik.
Ukiullu tulliini pisarineqartut malunnaatilimmik annikillipput, 1989-imilu qaleralinniartoqarpiarunnaarluni.
Piarineqartartut amerliartuinnarsimapput
Qaleralinniarneq 2009-mi aallarteqqinneqarpoq 200 tonsit missaannik pisaqartoqartarluni, 2009-miillu ukiuni tullerni marlunni pisariaqartartut amerliartorput 1.000 tonsit missaanniittarlutik.
Nuup Kangerluani qaleralinniarnermi ukiumoortumik 500 tonsit sinnerneqartannginnissaat Pinngortitaleriffiup maanna kaammattuutigaa.
Tamannalu ukiuni 1963-imit 1983-imut agguaqatigiissillugu tulaanneqartartut annertoqatigaat, taamani piujuaannartitsinissamik tunngaveqartumik aalisarnerup ingerlanneqartutut nalilerneqarluni.
Karl-Kristian Kruse isumaqarpoq Nuup Kangerluani qaleralinniarnerup killilersortariaqarnera nassuerutigineqartariaqartoq qanoq annertutigisumik pisaqartoqarsinnaaneranut erseqqissunik killiliisoqarluni. Pisassiissutigineqartullu aalisariutinut angallatinut umiatsiaaqqanullu agguarneqassaaq, soorlu tamanna Avannaani periaaserineqartoq.
