Kruse: Qaleralinniarnermi malittarisassat sukaterneqartariaqarput
Karl-Kristian Krusep oqaatigeriikkani tusagassiortunik marlunngormat katersortitsinermini oqaatigeqqippai. Tassalu aalisakkat pinngortitap pissusia malittaralugu amerlisarlutillu ikilisartut, qalerallillu Qeqertarsuup Tunuani ikilinerat aalisapilunnermik tunngaveqanngitsoq. Aalisapilunneq ilaatigut Pinngortitaleriffimmit pissutaasorineqarpoq.
Tassalu Karl-Kristian Krusep Pinngortitaleriffiup qaleralittassiissutit ikilinissaannik inassutaa malikkusunngilaa. Aammattaaq Nuummi qaleralinniarneq killilersorneqarsinnaaniassammat Nuup aqutsiveqarfinngornissaa sulissutigineqartoq, Karl-Kristian Krusep ilisimatitsissutigaa.
Aalisarfinnik killilersugaaffiunngitsunik, qaleralinnik amerlanernik pisaqartitsisartunik, atuutsitsiunnaarnissaq pissutissaqarsorinagu, aalisarnermut naalakkersuisup aamma oqaatigaa.
Arctic Prime Fisheriesimit paasissutissinneqarusuttut
Arctic Prime Fisheriesip Kujataani suliffissuarnut amerlanerusunik sooq tulaassisimannginnera pillugu paasissutissiissummik aalisarnermut naalakkersuisoqarfik piumasaqarsimasoq, Karl Kristian Krusep oqaatigaa.
Arctic Prime Fisheries saarullittassiissutinik 8000 tonsinik tunineqarsimasoq, taakkualu affaat nunamut tulaanneqarnissaannik pisussaaffeqartoq, Naalakkersuisup oqaatigaa. Taamaattoqarsimannginneranullu suna pissutaanersoq naalakkersuisut paaserusuppaat.
Aalisakkat ikissimanerat, ingerlatseqatigiiffiullu kilisaataataata amutsivimmiinnera tunisat ikinnerannut pissutaasut, Arctic Prime Fisheriesimit KNR-imut siornatigut oqarput.
Appanniarnermut malittarisassat sukaterneqassasut
Karl-Kristian Kruse appanniarneq pillugu aamma oqaaseqarpoq. Appat ukiuni qulini eqqissisimatitaalluinnassasut, Pinngortitaleriffimmit inassutigineqareerpoq.
Karl-Kristian Kruse Naalakkersuisullu siulittaasuat, Kim Kielsen, appat pillugit isumaqatigiinnerupput. Kim Kielsenip appanniarnerup aqunneqarnerata sukaterneqarnissaa inatsisartut ukiakkut ataatsimiinnerata ammarneqarneranut atatillugu oqalugiarnermini oqaatigaa.
Karl-Kristian Krusellu appanniarneq sukateriffigineqassasoq, ilaatigut appaqarfinnik eqqissisimatitsinikkut, saqqummiinermini oqaatigaa.
