Qulaarpaa Siusinaartumik soraarnerussutisiallit sulissapput
Nunarput nunanut avannarlernut sanilliutissagaanni siusinaartumik soraarnerusutisiallit inuiaqatigiinnut sanilliunneranni amerlanerupput. Tamanna Naalakkersuisut allanngortikkusuppaat.
Siunissami siusinaartumik soraarnerusutisiaqartarneq ukiunik tallimanik sivisussuseqartassaaq. Sivisussusaata saniatigut siusinaartumik soraarnerussutisiaqarneq assigiinngitsunut pingasunut avinneqassaaq, qanoq sulisinnaatigineq apeqqutaalluni qaffasinnermik, akunnattumik appasinnermillu pisartagaqartalissallutik. Allannguutaasussat Inatsisartut ukiakkut ataatsimiinnerminni aalajangiiffigissavaat.
Allannguutit siunertaraat siusinaartumik soraarnerussutisiallit amerlanerit suliffinnut sivisunerusumik attaveqarnissaat.
AAMMA ATUARUK SIK: Akileraarutit qaffanniarsigit
Sulisinnaassuseq malillugu pisartagaqarneq
Siunnersuut akuerineqassappat, innuttaasut sulisinnaajunnaangajassimasut sulisinnaajunnaavissimasullu qaffasinnermik pisartagaqassapput, tassa ullumikkutut qaammammut 9.083 koruuninik pisartagaqassallutik. Sulisinnaanerusut 6.056 koruuninik imaluunniit 4.542 koruuninik pisartagaqalissapput. Pisartagakinnerillu saniatigut isertitaqarnissaminnik isumalluuteqartariaqalissallutik.
Naalakkersuisut nassuerutigaat amerlanerit nalinginnaasumik sulisinnaassanngitsut. Taamaattumik nikerartumik suliffiusinnaasunik pilersitsisoqassaaq, siusinaartumik soraarnerussutisiallit piffissami tamakkiisumi sulisannginniassammata.
Tamakku saniatigut pineqartut sulisinnaassusaat ukiut tallimakkuutaarlugit nalilersorneqartalissapput. Nalilersueqqittalernissamut peqqutigineqarpoq nakorsaasersornikkut siusinaartumik soraarnerussutisialik sulisinnaanerulersinnaammat. Sulisinnaanerulersimassappallu sulilertariaqassaaq.
AAMMA ATUARUK Amigartooruteqaannarnissaq mianersoqqussutigigaat
AAMMA ATUARUK Atugarissaarneq aarlerinartorsiortinneqartoq
Sipaarutit annikitsut
Siusinaartumik soraarnerusutisiallit, pingaartumik inuusunnerumaartut, pitsaanerusumik atugaqalernissaat, taamatullu suliffimmut attuumaannarnissaat siunertarineqarpoq.
Aaqqissuusseqqinnermili sipaarnerunissaq aamma anguniarneqarpoq. Inuiaqatigiinni inuit sulisinnaagaluarlutik sulinngitsut akissaqartinngilagut. Aningaasaqarnermut naalakkersuisoqarfiup naatsorsuutaani erserpoq aaqqissuusseqqinnermi 11,1 milliuunit koruuniinnaat sipaarneqassasut, taamatullu aatsaat 2019-imi sipaaruteqarneq malunnarsissasoq.
Akitsuusersuinissaq sanilliutissagaanni, akitsuutit qaffaavigineqarneranit 100 milliuunit koruuningajannik sipaartoqassaaq.
Qulaarpaa unnugu aallakaatinneqarpat aningaasanut inatsisissatut siunnersuut sammineqassaaq. Qulaarpaa kalaallisut nal. 19.30, danskisullu nal. 20.30 aallartinneqassaaq.