Torben M. AndersenAssi: KNR

Qulaarpaa Amigartooruteqaannarnissaq mianersoqqussutigigaat

Aningaasaqarnermut Siunnersuisooqatigiit aningaasanut inatsisissatut siunnersuut sakkortuumik uparuarpaat. Akitsuusersuinissaq ukiunilu arlalinni amigartooruteqarluni ingerlatsinissaq siulittaasoqarfiup ukiumoortumik nalunaarusiamini sakkortuumik uparuarpaa.

Aningaasaqarnermut Siunnersuisooqatigit siulittaasoqarfiata nunatta aningaasaqarnera pillugu ukiumoortumik nalunaarusiani marlunngormat saqqummiuppaa. Aningaasaqarnermillu ilisimasallit oqaasertaliornerat kusassagaagaluartoq oqariartuutigisaat paatsuugassaanngilaq. Suliffissaaleqinerujussuaq politikerinit pimoorullugu iliuuseqarfigineqanngilaq, akitsuusersuineq ajornartorsiutinut aaqqiissutissaanngilaq aaqqissuusseqqinnissamillu pilersaarutigineqartut aningaasatigut ikippallaartunik isertitsissutigineqassallutik. Aammattaaq nunatta karsiata sinneqartooruteqaleqqinnissaanik neriuuteqarluni ukiuni arlalinni amigartooruteqarluni ingerlatsinissaq mianersoqqussutigaat.

AAMMA ATUARUK Atugarissaarneq aarlerinartorsiortinneqartoq

 

Aaqqissuusseqqinnerit sunniutaat annikippallaartut

Politikerit aaqqissuusseqqittoqarnissaanik ukiuni arlalissuarni neriorsuuteqartarput, taamaaliornikkut nunatta aningaasaqarnera siunissami qajannaannerulersikkumallugu. Inatsisartullu ukiakkut ataatsimiinnerani utoqqalinersiuteqarnermik siusinaartumillu pensionisiaqarnermik aaqqissuusseqqinnerit kiisami saqqummiunneqartussanngorput. Utoqqaat amerligaluttuinnarnerisa kingunerisaanik aningaasartuutit isertitallu oqimaaqatigiikkunnaarnerinut taakku iluaqutaasussaassapput. Aningaasaqarnermulli Siunnersuisooqatigiit Naalakkersuisut aaqqissuusseqqinnissamik siunnersuutaat naammaginngilaat. Siunnersuisooqatigiimmi allapput ajornartorsiutaasut ilaannaannut annikitsuinnarmillu iluaqutaassasut. Allatut oqaatigalugu: Piffissaq ungasinnerusoq eqqarsaatigalugu ajornartorsiutaasussanut aaqqiissutaasinnaanngillat.

 

Akitsuusiineq aaqqiissuteqarallarneruvoq

Akitsuusiinissaq aamma annertuumik isorineqarpoq. Aningaasaqarnermik ilisimasallit allapput aaqqissuussaanikkut ajornartorsiutinut annerusumik aaqqiissutaanavianngitsoq. Tamatuma saniatigut sulinerup akilersinnaalersinnissaanik aalajangiisoqarnissaanik aningaasaqarnermik ilisimasallit ujartuipput.

Politikerillu aaqqissuusseqqinnerit aqqutigalugit aningaasanut inatsisip sinneqartooruteqartinnissaanik neriorsuuteqartuarnerat aamma tikkuarpaat. Sinneqartooruteqarnissaq kinguartinneqartuartoq. Maanna aamma kinguarteqqinneqarpoq, tamatumuuna 2019-imut. Aningaasaqarnermut Siunnersuisooqatigiit ersarissuliorlutik oqaatigaat sinneqartooruteqarnissamut piffissaliussaq tamatumuuna eqquutsinneqartariaqartoq.

Isummersuutit


 

Pages