Assi: KNR

Qulaarpaa Atugarissaarneq aarlerinartorsiortinneqartoq

Aappaagumut aningaasanut inatsisissatut siunnersuummi kisitsisit atuarlugit imaannaanngitsuuvoq. Akitsuusiinissamimmi siunnersuuteqartoqarnera kalaallinut akisunerulersitsissaaq. Taamaaliortoqaraluartorlu aningaasaqarnikkut ajornartorsiuterpassuit iluarsineqarnavianngillat.

Aappaagumut aningaasanut inatsisissaq Inatsisartuni sapaatit-akunnerata tulliani oqaluuserineqalerpat aaqqiissutissanik ajornanngitsunik nassaarnissaq ajornakusuussaaq. Aningaasaqarniarneq tatineqarsimavoq innuttaasunullu tunniussaqarnissaq akissaqartinneqanngilaq.

Akerlianik Aningaasaqarnermut naalakkersuisoq, Anda Uldum (D), akitsuusersuinissamik nunatta karsianut aningaasaateqarpallaanngitsumut 100 millionit koruuninik isaatitsisussamik siunnersuuteqarpoq. Atuarlugu nuanniippaluppoq, akitsuusiinerinnakkulli aningaasanut inatsisissatut siunnersuut oqimaaqatigiisseqqajarnerpoq. Aappagumi 2017-imilu amigartooruteqarnissaq pilersaarutaavoq, aatsaallu 2019-imi ukiuni marlunni amigartooruteqarsimanitsinnut angummateqqissinnaassalluta.

 

Kalaaliulluni akisunerulissaaq

Partiit arlallit, taakkununnga ilaallutik Demokraatit, akitsuusersuinissaq isornartorsiorpaat. Apeqqutaasorlu tassaavoq 100 millionit koruunit suminngaanniit pissarsiariniassaneraat. Akileraarutit qaffanneqarnissaat aamma siunnersuutigineqarpoq. Taamaaliornikkut nammakkiutigineqartut allaanerulaartumik agguataarneqassapput, tunngavisiumullu allannguutaassanatik: Aappaagumit kalaaliulluni akisunerulissaaq.

Siunnersuutigineqartorlu alla tassaavoq allaffissornerup sipaarniarfigineqarnissaa. Tamannali annertuumik sunniuteqartussaassaaq. 100 millionit koruuninimmi pissarsiaqarfigissagaanni inuppassuit soraarsinneqartariaqassapput.

 

Siunissami ungasinnerusumi ajornartorsiutinut aaqqiissutissaqanngilaq

Inatsisartuni politikerit ataatsimut isigalugu qanoq-iliuuseqarsinnaarpianngillat. Aningaasanut inatsisissatut siunnersuut iluatsinneqassappat siusinaartumik pensionisiaqarnermik utoqqalinersiuteqarnermillu aaqqissuusseqqinnissaq pisariaqarpoq. 

Aningaasaqarnermut Siunnersuisooqatigiit mianersoqqussuteqarnerat ersarippoq: Aaqqissuusseqqinnerit taakku ingerlanneqanngippata 2019-imi ataatsimoortumik sinneqartooruteqarnissaq anguneqarsinnaanngilaq.

Siunnersuisooqatigit tamatumunnga peqatigitillugu erseqqissaatigaat aaqqissuusseqqinnerit pineqartut marluk siunissami ungasinnerusumi ajornartorsiutaasussanut annikitsuinnarmik iluaqutaassasut. Ajornartorsiutit taakku pissutigalugit aningaasartuutit piffissap sivikitsup ingerlanerani isertitanit amerlanerulissapput. Politikerillu taamatut inissisimaneq piaartumik iliuuseqarfiginngippassuk atugarissaarnikkut annikillissaanissaq ukiut arlaqanngitsut qaangiuppata pisariaqassaaq. Annikillisaanerit nunatsinni innuttaasunut tamarluinnarnut sunniuteqartussat.

Qulaarpaa unnugu aallakaatinneqarpat aningaasanut inatsisissatut siunnersuut sammineqassaaq. Qulaarpaa kalaallisut nal. 19.30, danskisullu nal. 20.30 aallartinneqassaaq.

 

Aamma takuuk knr.gl/qulaarpaa

Isummersuutit


 

Pages