Siunnersortitut ilinniarfiup nuunneqarniarnera piviusorsiunngitsoq
Nunatsinni ilinniarfiit sisamat illoqarfinnut allanut nuunneqarnissaat kommunit Namminersorlutillu Oqartussat pilersaarusioraat, Ilinniartitaanermut naalakkersuisoqarfiup uppernarsarpaa.
AAMMA ATUARUK Ilinnialerusuttut 75 procentii qatangiinnarneqartut
Tamannali aarlerinartoqartoq, Ilisimatusarfimmit oqaatigineqarpoq.
- Maani matullugu illoqarfimmut allamut nuukkaanni, ilinniartunik naammassinnitsitsisarnerput kissaatigissatsinnut sukkaannerulissaaq, Ilisimatusarfimmi isumaginninnermut tunngasunut immikkoortortaqarfimmi adjunkti Steven Arnfjord oqarpoq.
Ilinniarfiit sisamat Nuummiittut Naalakkersuisut illoqarfinnut allanut nuukkusuppaat, Siunnersortitut ilinniarfik Ilulissanut nuunneqassasoq, Eqqumiitsuliornermik ilinniarfik Aasiannut, Sanaartornermik ilinniarfik Sisimiunut kiisalu Niuernermik Ilinniarfik Qaqortumut nuunneqassalluni.
Isumaginninnermut siunnersortitut ilinniarfik Ilulissanut nuunneqassappat Perorsaanermik ilinniarfik piareeqqavoq.
- Oqanngilagut Isumaginninnermut siunnersortinngorniat maanga nuussasut, kisiannili holdimik allamik maani aallartitsisoqarsinnaappat taanna ammaffigivarput, Perorsaanermik Ilinniarfimmi pisortaq, Nuka Kleemaann, oqarpoq:
Perorsaanermik Ilinniarfiup atuartitsivii qulingiluanik ilaneqassapput kollegiallu 20-nik ilaneqassallutik, kisiannili:
AAMMA ATUARUK KTI: Sungiusarfiit pisariaqartippagut
- Immaqa apeqquserneqarsinnaavoq ilinniartitsisussat aallartisarnermi qanoq amerlatigisut pissarsiarinissaat immaqa kigaallassaataasinnaavoq.
Kisianni ilinniarfik nuunneqassappat, ilinniakkap pitsaassusaa appassasoq ilisimatusarnikkullu ilisimalikkat annaaneqassasut, Steven Arnfjord isumaqarpoq.
Taannaannaanngilarli. Aamma allaffissornikkut suliat allanngussapput. Ilinniartummi 120-usut sungiusaammik suliffissaaleqilersinnaapput.
AAMMA ATUARUK Ilinniartunut inissianik sanaartortoqalersoq
- Ilinniarfiuvugut illoqarfissuarmiittussaq. Illoqarfissuarmi isumaginninnermi sulisoqarpoq illoqarfimmilu isumaginninnikkut iliuuseqartoqarluni. Tassa suliatsinni piginnaasassarput qitiusoq, Steven Arnfjord oqarpoq, nangillunilu:
- Taamaaliornissatsinnut isumaginninnermi aqutsisoqarfeqartariaqarpoq, illoqarfimmi assigiinngiiaartunik inoqatigiiaaqartariaqarpoq, ilinniartuvut sungiusaammik suliffissarpassuaqartariaqarput. Tamakkualu illoqarfiit allat tunniussinnaasariaqanngilaat, Ilisimatusarfimmi isumaginninnermut tunngasunut immikkoortortaqarfimmi adjunkti Steven Arnfjord oqarpoq.
