Inatsisissatut siunnersuummi praktikerfissat qulakkeerniarneqarput
Inuusuttut untritilikkaat ukiuni aggersuni suliffeqalernissaannik qulakkeerinnittussamik Naalakkersuisut inatsisissatut siunnersuummik upernaamut saqqummiussissapput.
Qaasuitsup Kommuniani inuusuttorpassuit unittooqqasut, KNR-imi pingasunngornermi oqaluttuarineqarpoq.
AAMMA ATUARUK Qaasuitsup Kommuniani inuusuttorpassuit unittooqqasut
Ajornartorsiut nunarput tamakkerlugu ajornartorsiutaavoq.
Tamanna Suliffeqarnermut Naalakkersuisup Vittus Qujaukitsup qanoq iliuuseqarfiginiarpaa.
Ilinniartut suliffeqarfinni namminersortuni aamma pisortat ingerlataanni praktikkerfeqarnissaat ilinniarnerminnillu atatillugu suliffeqarnissaat Naalakkersuisut Inatsisissatut siunnersuutiginiagaanni qulakkeerniarneqarpoq.
Inatsisissatut siunnersuut siorna ukiukkut inatsisartuni saqqummiunneqartussaagaluarpoq,upernaamulli inatsisartut ataatsimiinnissannut kinguartinneqarnikuulluni.
Inatsisissatut siunnersuutip inatsisartunut saqqummiunneqarnissaa sioqqullugu sulisoqarnermut illuatungeriit kommunit naalakkersuisoqarfiillu oqaloqatigineqarnissaat siunertaavoq inatsisissap inaarutaasumik ilusilersorneqarnissaa pillugu.
Suliffeqarfiit pisortanit pigineqartut suliffeqarfiilluunniit aqqaneq marlunnik sulisoqartut ilinniartumik ataatsimik atorfinitsitsisarnissaat Inatsisissatut siunnersuutissami siunertarineqarpoq.
Oqartussaasulli praktikkerfissatut akuerineqarsimanngikkunik ilinniartunik praktikkertunilluunniit atorfinitsitsinissamut pisussaaffeqassanngillat.
Suliffeqarfiit namminersortut ammasumik neqeroortitsinermi ilinniartuuteqartut praktikkertuuteqartullu bonuseqartinneqartalernissaat inatsisissatut siunnersuutissami aamma siunertarineqarpoq.
Inatsisissamut siunnersuummi ilinniartut 400-it ukioq 2022-ip tungaanut praktikkerfeqalernissaat qulakkeerniarneqarpoq.