Suliffimmik misiliiffissat Ilinnialerusuttut 75 procentii qatangiinnarneqartut
Qalipaasutut, sanasutut, ruujorilerisutullu ilinniarfimmi 102-t ilinnialernissaminnut piukkunneqarput, taakkunanngali 25-naat ilinnialernissaminnut atatillugu sungiusaammik suliffissarsinngitsoorput.
- Tassuuna ajornartorsiuteqangaatsiarpugut, malittarisassammi naapertorlugit Sanaartornermik Ilinniarfimmi ilinnialerusuttoq suliffimmi ilinniarfissaqanngikkuni ilinnialernissaminut akuerineqarsinnaanngilaq, Sanaartornermik Ilinniarfimmi KTI-mi ilinniartitaanermut pisortaq, John Plambek oqarpoq.
KTI-p ilinniarnermut atatillugu sungiusaammik suliffissarsinngitsunut ilinniarfik qimanngikkaluarlugu 2008-mi neqeroorfigisinnaalerpai. Nuummi periarfissaq taanna 2008-mi atuutilerpoq.
Periarfissamilli tamatuminnga tallimaannaat ukioq kingulleq atuipput, taamaalillutik sinneruttut 72-it ilinniarnerminnut atatillugu sungiusaammik suliffimmik nassaartinnatik ilinniarnermik aallartissinnaasimanatik. Tassa ilinnialernissamut akuerineqartunit 75 procentit.