Siumut Uummannaq: Hammond siulittaasuusariaqarpoq
Aleqa Hammond Siumumut siuttunngoqqittariaqarpoq. Partiip Uummannami immikkoortortaqafia taama isumaqarpoq.
Inatsisartunut qinersinerni kingullerni marlunni Siumup partiitut anginerpaanngorneq ajornera aaqqinneqartariaqartoq, Uummannami Siumukkormiut isumaqarput. Siumullu nunatsinni partiini anginerpaanngoqqissappat Aleqa Hammond siuttuusariaqartoq immikkoortortaqafik isumaqarpoq.
- Taamaattumik siullermik aperisimavarput innersuunneqassaguni tigulluassaneraa, aamma taamannak oqarmat taamatut innersuupparput, Johannes Mathiassen KNR-imut oqarpoq.
KNR-ip allagaq Siumup Uummannami immikkoortortaqarfiata, Aleqa Hammondip siulittaasunngoqqinnissaanik kissaateqarlutik innersuussutaa, Siumup siulersuisuunerinut, allattoqarfianullu, juunip aallaqqaataanni nassiunneqartoq takuaa.
Naatsorsuuteqartut
Aleqa Hammond siulittaasunngoqqissagaluaruni partiimik ataatsimoortitsisinnaanera Uummannami siumukkormiut naatsorsuutigaat.
- Tassa taamatut naatsorsuutigaarput, Johannes Mathiassen oqarpoq.
Aleqa Hammond Siumumi nutaajunngilaq. Taannami partiimi 2009-miit 2013-imut siulittaasuuvoq.
Siumumit ilaasortaajunnaarsitaasoq
Aleqa Hammond Naalakkersuisunut siulittaasuulluni nunap karsiata aningaasaataanik 106.363 koruuninik atuisimasoq Inatsisartut Kukkunersiunermut Ataatsimiititaliaata paasivaa. Sivitsunngitsorlu Naalakkersuisuni partiimilu siulittaasuujunnaarpoq, partiimili ilaasortaanini nangillugu.
Aningaasat taakkua timmisartumut billetsinut, akunnittarfimmi unnuinernut, imerniartarfeeqqamik atuinermut, neriniartarfimmut neriartornernit allanullu nammineq inuttut akiligassanut atuinermut atorneqartarsimapput. Akiligassarlu tallimariarluni akileqquneqareermat Aleqa Hammondip aatsaat taamanikkut akilerpaa.
Aningaasanilli atornerluineri taakkuinnaanngillat. Siumut sinnerlugu Folketingemut 2016-imi ilaasortaalluni danskit inatsisiliortuisa aningaasaataannik 13.000 koruuninik nammineq atugassaminik atuisimasoq paasineqarpoq. Taassuma kingorna Siumumit ilaasortaajunnaarsitaavoq.
Innarliissanngitsutut nalileraa
Attaviitsooriarluni Nunatta Qitornaanut ilaasortanngoraluarpoq. 2021-imili ukiakkut Erik Jensenip Siumumut siulittaasuulluni Aleqa Hammond partiiminnut ilaasortanngoqqinnissaa akueraa.
Piukkunneqartup aningaasanik qinikkatut atuulluni atornerluisarsimaneri siulittaasunngoqqissagaluaruni partiip tatiginassusaanut innarliissanngitsut innersuussisut isumaqarput.
- Uanga taamatut eqqarsartaaseqanngilanga. Allatut eqqarsartarsimassangaluarpunga, eqqartuussiviit politiillu aqqutigalugit suliassaq ingerlanneqarsimappat. Kisianni taamaalisoqarsimanngimmat taamatut innersuussineq ingerlavoq, Johannes Mathiassen oqarpoq.
Siumut nuna tamakkerlugu immikkut ittumik sapaatit akunnerisa naaneranni Nuummi ataatsimeersuassaaq. Siumup Sisimiuni immikkoortortaqafiata Aleqa Hammond aamma siuttussamittut piukkuppaa.
