Nuummi asimi ikiueqqaartartut allagartartaartut nutaat 25-t

Nuummi pikkorissarnermi Wilderness First Respondersimi (WFR)-imi peqataasut 25-t nunani tamalaani Wilderness First Respondersitut allagartaqalerput

Pikkorissartitsineq Two Ravensip NOLS (National Outdoor Leadership School) aamma Kommuneqarfik Sermersooq peqatigalugit aaqqissuuppaa, tassanilu nakorsamit ikiorneqarnissamut ungasissumi attaveqatigiinnissallu killeqarfigisaani avinngarusimasumiilluni ikiueqqaarsinnaaneq sammineqarpoq.

- Inuit asimi ajornartoortoqartillugu piginnaasanik, imminut tatiginermik eqqissisimanermillu pisariaqartitaminnik iliuuseqarsinnaalernissaat anguniagaraarput, Two Ravensimi piginneqataasoq, Thorlak Skifte Nielsen tusagassiuutinut nalunaarummi oqarpoq.

Two Ravensip NOLS (National Outdoor Leadership School) aamma Kommuneqarfik Sermersooq peqatigalugit  Wilderness First Respondersimik ulluni qulini pikkorissartitsineq aaqqissuuppaa. Assi © : Two Ravens

Ikiueqqaarneq nunatsinnut naleqqussarneqartoq

Peqataasut ilaata, Lasse Nymandip pikkorissarneq sakkortullunilu pissarsiaqarnarluartutut nassuiaatigaa.

- Ullut qulit pitsaasumik sakkortupput – pisuusaartitsinerpassuupput, nunatsinni piviusumik pisoqarnissaanut qaffasissumillu piginnaasaqarfiunissaanut takussutissiilluarpoq. Pikkorissarneq ikiortissap ungasilluinnarnerani atortussanik aalajangersimasunik isumannaatsumik sunniuteqarluartumillu atuisinnaalersitsivoq, tamannalu kajumissutsiminnik suliaqartunut, immikkut ilisimasalinnut asimiittartunullu sunniuteqarluarpoq.

- Neriuppunga una WFR-imik ukiumoortumik pikkorissartitsinerit aallarniissutigissagaat – kikkullu tamarmik pikkorissarnissaat innersuussutigilluarusuppara, taanna tusagassiuutinut nalunaarummi oqarpoq.

Pikkorissarnermi pinngortitamik nuannarisassalinnik, takornariartitsinermik suliaqartunit, annaassiniartartuniillu peqataasoqarpoq.

Peqataasut napisimasunik, timip nillertikkiartornerata kingunerisaanik timip suliunnaarneranik, asimilu ajutoornernik allanik suliarinnissinnaaneq kiisalu pissutsit ajornakusoorneranni angallassigasuarneq ilaatigut ilinniarpaat. Peqataasut isumalluutinik asimi nassaassaasinnaasunik atuisinnaaneq aamma misilittagaqarfigilerpaat.

Peqataasut 25-t Idaho Rescue Trainingimit ilitsersuisumit ilinniartinneqarput. Assi © : Two Ravens

Takornariaqarnerup toqqissisimanarnerulernissaanut alloriarneq

Pikkorissartitsineq takornariaqarnermi isumannaatsuunissap pitsanngorsarnerata Nuullu issittumi asimiittarnermi siuttuulernissaanut suliaqarnerup ilagigaa, Kommuneqarfik Sermersuumi Visit Nuummi destinations manager, Bea Husum Terkildsen oqarpoq.

- Takornariaqarfittut tikeraartutta nunatsinni toqqissillutik misigisassarsiorsinnaanissaat qulakkeerusupparput. Pikkorissartitsineq una nunap immikkoortuani najukkamilu takornarialerisut isumannaatsuunerannik pitsaanerulersitsinissamut pingaarutilimmik alloriarneruvoq.

Takornariat nunatsinnukarlutik asimi misigisassarsiortut amerliartornerat ilutigalugu isumannaatsuunissamut periutsit qaffasinnerungaatsiarnissaat pisariaqartinneqarpoq. WFR-imik pikkorissarnerup peqataasut kangerlunni, qaqqani najukkaniillu ungasissuni ajornartoornernik isumaginninnissamut piginnaasaqalersippai.

- Pikkorissarnermut peqataasoqangaatsiarnera nuannaarutigilluinnarparput. Wilderness First Respinderitut sungiusarneq ikiueqqaarnermut kisimi tunngassuteqanngilaq. Tamanna najugaqavissunut tikeraanullu asimi toqqissisimanermik isumannaatsuunermillu pilersitsinissamut tunngassuteqarpoq.

- Amerlanerusut taama ilisimasaqarneratigut inuiaqatigiittut ungasissumiinnermi naatsorsuutiginngisamik nakorsamit ikiorneqarnissamut pisariaqartitsisoqaleratarnissaanut piareersimanerulissaagut, Thorlak Skifte Nielsen oqarpoq.

Idaho Rescue Trainingimit ilitsersuisunit aqunneqartumik oktobarip ulluisa aqqarnannit 20-ata tungaanut  pikkorissaasoqarpoq.