Greenland Airportsip Kulusummi ikuallattoqarnerata kingorna ajoqusernerit misissorsimalerpai

Mittarfimmi quersuaq oktobarip 18-ianni ikuallammat, pujorsuup qernertup napasuliatut ilusillip Kulusuk qulangeqqavaa.

Atortut ikuallannermit nungutinneqarsimasut ilaat pillugit Greenland Airports maanna ima oqaasertaliivoq:

- Atortorissaarutit soorlu sermiiaat, orsussamut assartuut, kivitsissut nunamullu assaassuteeqqat ikuallannermit ajoquserneqarsimapput. Aammattaaq atortorissaarutit assigiinngitsut, soorlu assakaasut kingoraartissallu annaaneqarsimapput, Greenland Airportsimi attaveqaqatigiinnermut pisortaq, taama Mikkel Bjarnø Lund allakkatigut akissuteqarluni ilisimatitsivoq.

Atortorissaarutit soorlu qatserisartut biilii, aputaajaatit atortui, assartuinermi atortut timmisartunullu orsussaq, ikuallannermit ajoquserneqarsimanngitsut Greenland Airports ilisimatitsivoq.

Atortut ajoquserneqartut umiarsuaqaqqinnerani qanoq iluarsaanneqarsinnaatiginersut maannakkut misissuleruttorpaat.

- Sapinngisarput tamaat atorlugu sulinitsinnut kinguarsaataasinnaasut killilersimaarniarpagut, atortullu pisariaqartinneqartut aamma qulakkeerniarneqarlutik, Mikkel Bjarnø Lund oqarpoq.   

Timmissartuussinermut kingunissai 

Taamaattumik ikuallannerup Tunumi timmisartuussinermut qanoq kinguneqarnissaa, Greenland Airportsip maanna oqaatigisinnaanngilaa.

- Sermiiaat, tassungalu atugassiaq imerpalasoq kingoraartissallu aserorsimammata, piffissamut qaninnerusumut taakku killilersueratarsinnaapput, Mikkel Bjarnø Lund allappoq.

Attaveqatigiinnermut pisortaq oqaluttuarpoq periarfissat paasineqarluarsimalerpata Greenland Airports ilisimatitsiumaarmat, kingunerisinnaasaalu aamma ilisimatitsissutigineqarumaarlutik.

KNR-ip ikuallattoqarneranut suna pissutaanersoq  Kalaallit Nunaanni Politiivinut paasiniarpaa.  Akineqarnissarput suli utaqqivarput.