Kulusumi ikuallattoqarnerani pujuliorujussuarneranilu mittarfik arfininngornermi matuneqartoq

Kulusumi mittarfiup sannavia ikuallalermat arfininngornermi nalunaaqutaq 15.30 aamma 21.00 akornanni mittarfik matoqqatinneqarpoq.

- Mittarfiup sannaviani “sannavitoqqami” Kulusummi mittarfiup qanigisaani ikuallattoqalersimavoq. Mittarfik ingerlaannaq matuneqapallappoq, Greenland Airports ippassaq ualikkut allappoq.

Mittarfimmiittut hotelimiittullu sulisullu tamarmik ikuallattup qaminniarneranut attuumassuteqanngitsut Kulusuup nunaqarfittaanut qimagussuunneqarput. 

Ikuallanneq qaminneqartoq mittarfillu arfininngornermi nalunaaqutaq 21.00 ammaqqinneqassasoq, Greenland Airports-ip nalunaaqutaq 19.23 nalunaarutigaa.

Ikuallattumik qamisaanermut ikiuuttussanik qatserisartunik Tasiilamiit Kulusumukartitsisoqartoq, Kalaallit Nunaata Politiiviniit politiit pisortaata tullersortaa aamma Kalaallit Nunaanni Upalungaarsimasuni siulittaasoq Katrine Sandgreenip tusagassiutinut nalunaarummi paasititsiissutigaa.

- Sumiiffimmi suliaqarnermut atatillugu ajutoortoqarsimanera erniinnartumik erseqqissivoq, politiillu nunaqarfimmut apuupput sumiiffimmi apersuiartorlutillu misissuiartorlutik, taanna allappoq.

Sila qaammariarpat Politiit sumiiffimmi misissuinertik, aseruatitersimasullu tamakkerlugit misissorneri nangissagaat, pigaartut pisortaat Thomas Jeppesen ullaaq manna paasissutissiivoq.