Siumut: Taamaammat Aleqa anisipparput
Siumut sinnerlugu Folketingimut maannamut ilaasortap Aleqa Hammondip, Folketingip kreditkortianik nammineq atugassaminut atuisimanera Siumup nuna tamakkerlugu siulersuisuunerinit qisuariarfigineqarpoq, Aleqa Hammondillu Siumumi ilaasortaajunnaarnissaa siulersuisuunernit aalajangerneqarluni.
- Ulluni kingullerni Aleqa Hammondip aningaasaqarnikkut inissisimaneranut, Folketingillu kreditkortianik atuisimaneranut tunngassuteqartut Siumup Siulersuisuunerini eqqartorpavut, Siumup siulittaasua Kim Kielsen, tusagassiuutinut nalunaarummi ilaatigut allappoq, imalu nangilluni:
- Isumaqarpugut "ajornartoornermi" Folketingip kreditkortianik atuisariaqalernerup siumoortumik ilisimatitsissutigineqarsimallunilu paaseqatigiissutigineqarsimaneranik Aleqa Hammondip tamanut ilisimatitsissutigineqarnera eqqunngitsumik tunngaveqartoqartoq. Maluginiarparput Folketingip Allattoqarfianik tassanilu Aningaasaqarnermik pisortamik ataatsimeeqateqarnermini, Aleqa Hammondip nassuerutigaa nammineq malittarisassaasunik kukkusumik nalilersuisimanini aallaavigalugit taamatut pisoqarsimasoq, Kim Kielsen oqarpoq.
Aleqa Hammondip Folketingimi ilaasortatut tunuarnissaa siulersuisuunerit kaammattuutigisimagaluarpaat.
- Siumup Siulersuisuunerini isumaqatigiilluta Aleqa Hammond kaammattorparput nammineq Folketingimi ilaasortatut tunuarniuteqaqqullugu. Taamaalillunilu Siumup sinniisissaa siulleq tamatumani sulianik nangitsisillugu, Kim Kielsen, siulersuisuunerit sinnerlugit oqarpoq, imalu naggasiilluni:
- Siulersuisuunerit ilanngulugu aalajangiupparput Aleqa Hammondip Folketingimi ilaasortaanini ingerlatiinnassagukkut Siumut Partii tunuliaqutaaqqissinnaanngitsoq, Kim Kielsen oqarpoq.
Aamma atuaruk Kim Kielsen: Aleqa Siumumit anisinneqarpoq
Aamma atuaruk Kreditkortimik atuineq pillugu allaaserisat tamaasa
