Aleqa Hammond Siumumi siulittaasutut piukkunneqartoq
Siumut juunip 28-anni Nuummi immikkut ittumik ataatsimeersuassaaq. Ataatsimeersuarnermi siulittaasussarsiorneq pingaarnertut suliarineqassaaq.
Siumut Sisimiunit partiip siornatigut siulittaasorisimasaa, assortuussutaasartoq, Aleqa Hammond siuttutut maanna piukkunneqalerpoq. Immikkoortortaqarfiup siulittaasua KNR-mut taama allappoq.
- Siumut Sisimiut inummik nukittuumik, Siumup anguniagaanik nalornissuteqanngitsumik aammalu partiitut anginerpaanngoqqinnissaanut suliaqarsinnaasoq, Siumup nuna tamakkerlugu immikkut ittumik ataatsimeersuarnissaanut piukkussamisut Aleqa Hammond sassarnissaanik kaammattorpaa, Siumut Sisimiuni siulittaasoq Inuuteq Bech allappoq.
Siumut Sisimiut isumaqarpoq Aleqa Hammond partiimi ataatsimoortitsisinnaassuseqartoq aamma nunap siuttussaatut piukkunnarnersaasoq.
Siumut Sisimiut siulittasuata isumaa naapertorlugu Aleqa Hammond Naalakkersuisunut, Inatsisartunulluunniit ilaasortaanngikkaluarluni piffissaqarluarluni partiimut siulittaasuusinnaanera upperineqarlunilu tapersersorneqarpoq.
- Taamaattumik sinerissami Siumukkormioqaterpassuagut suleqatiseraagut. Aleqa Hammond Siumumi Siulittaasussatut qinigassanngortinnissaanik suleriaqqinnissami neriuutigilluinnarlutigu, tamanna innersuunneqartumiit immikkoortortaqarfinniillu tigulluarneqarumaartoq, Inuuteq Bech allappoq.
Siumup nuna tamakkerlugu malittarisasai naapertorlugit siulittaasussatut ataatsimeersuarnermi sassartussaq Siumut sinnerlugu qinikkatut atuuffeqartariaqanngilaq. Ataatsimeersuartulli amerlanerussutillit piukkussippata tamanna atuutissaaq.
Partiimi siulittaasutut inissisimareersoq
Aleqa Hammond Siumumi siulittaasooreerpoq.
Siumut nunatsinni naalakkersuinikkut ukiuni 30-ni siuttooreertoq Inatsisartunut 2009-mi upernaakkut qinersinermi IA qinersiseqarnerpaalluni siuttunngormat, taamani siulittaasuusoq Hans Enoksen tunuarpoq. Aleqa Hammond tamatuma parti Inatsisartuni illua tungiliuttuulersoq silittaasuuffigalugu.
Siumut 2013-mi qinersinermi partiini annerpaanngorpoq, Aleqa Hammondillu siuttuuffisisaamik Siumut, Atassut aamma Partii Inuit naalakkersuisoqatigiilerput.
Aleqa Hammondilli nalakkeersuoisuni siulittaasuunera sivisugaanngilaq.
Tassami naalakkersuisut siulittaasunngutsiareerluni pisortat aningaasaataanik atortarsimasoq kukkunersiuinermut ataatsimiititaliap paasivaa. Aleqa Hammond 204.000 koruuninik Namminersorlutik Oqartussat aningaasaataanik atuisimavoq. Kukkunersiuisullu arlaleriarlutik akileeqqusisareersut, Aleqa Hammondip 2014-imi aningaasat Nunatta karsianut utertippai.
Tassuma malitsigisaanik naalakkersuisut siulittasuattut tunuarpoq.
Siumumi siulittaasutut 2014-imi tunuarpoq.
