Partii Siumut immikkut ittumik ataatsimeersuartussanngorpoq. Tamanna partiimi maannakkut siulittaasuugallartup, Vivian Motzfeldtip, KNR-imut uppernarsarpaa.

- Piareersarlugu aallartereerpugut. Naatsorsuutigaarput qinersineq maannakkut Inatsisartunut naammasseqqammisoq, aammalu malitsigisaanik kommunimut qinersinissaq pisussaasoq taakku naammassiteriarlugit aammalu Inatsisartut siullermeerlutik katersuunnissaat taanna qaangiutseriarlugu aasarlualernerani immikkut ittumik ataatsimeersuarnissaq taanna piviusunngortinneqassasoq, siulittaasuugallartoq KNR-imut oqarpoq.

Ataatsimeersuarneq qinersiniinnaassasoq

Siumukkormiut aallartitaat Nuummi, ataatsimeersuarfimmi najuullutik, immikkut ittumik ataatsimeersuassapput. Anguniakkalli partii Qasiagiannguani 2023-imi ataatsimeersuarmat aalajangiussat aappaagu ileqquusumik ataatsimeersuarnissap tungaanut nikissanngillat.

- Anguniakkanik suliarinniffiussanngilaq. Immikkut ittumik ataatsimeersuarnerummat. Tassanilu siulittaasumik, siulittaasup tullianik, pingajuannik aammalu siulersuisunik qinersinermik malitseqassaaq, Vivian Motzfeldt oqarpoq.

Vivian Motzfeldt partiimut siulittaasutut tamakkiisumik atuutilerusuppoq. Taamaattumik immikkut ittumik ataatsimeersuarnermi siulittaasussatut sassarniarpoq.

Partiip malittarisassaani allassimasut naapertorlugit siulittaasoq qinigaaffiup ingerlanerani tunuassagaluarpat siulittaasup tullia siulittaasunngorallassaaq. Taamaattumik Vivian Motzfeldt maanna siulittaasuugallarpoq.

Erik aqutsisunut akuujunnaartoq

Erik Jensen, partiip qinersinermi angusarlunnerujussua peqqutigalugu siulittasuujunnaartoq siulersuisuunernit aamma tunuarpoq.

- Eriup kissaatigaa Siumup siulersorneqarneranit tamakkiisumik anissalluni. Taamatullu oqarneq isumaqanngilaq Siumuminngaanniit anisoq. Suliassani qinikkatut Siumut tamakkiisumik tapersersorlugu sulinissaminik inissikkusunneruvoq siulersuisuunernut ilaanerminngaanniit.

Erik Jensen taama iliornerata kingorna siulersuisuunernut nutaamik ilaasortanngortoqanngilaq. Aasap tungaanut maanna issiasut aqutsisuussapput.

Kinguaariit nikittut

Partiip inuusuttaaneersoq, siulersuisuunernullu ilaasortaq, Amalie Bourup, siulittaasup tulliattut maanna atuutilerpoq. Taanna 30-inik ukioqarpoq. Inuusuttullu partiimi nuimanerusariaqalertut siulittaasuugallartoq naliliivoq.

- Isumaqarpunga pingaarnerpaatut taanna oqariartuutigineqartoq. Kinguaariit nikinnissaat, Vivian Motzfeldt oqarpoq.