Siumup oqaluttuarisaanerani qinigaanikinnerpaaneranut akisussaaffik Erik Jensenip tigugaa
Ukiorpassuit politikkikkut aqutsisuupput, Siumulli 2025-mi Inatsisartunut qinersinermi oqaluttuarisaanermi aatsaat taama ingerlanerlutsigaaq. Appariarnerujussuarmullu akisussaaffik, partiip siulittaasuata Erik Jensenip tigugini oqaatigaa.
- Taamatut taasisimanerat, tusagassiutitigullu soorunami Siumut qanoq ingerlariaqqinnissani taanna eqqartortussaagaa qularnanngilaq, taamaattumik tusaasassatut tiguagut oqariartuutit ataqqisassarillutigillu. Kisianni uanga akisussaaffik tamaat paarisara ilisimaqqissaarpara, Erik Jensen oqarpoq.
Inatsisartunut qinersinermi Siumut 4.210-nik qinerneqarpoq. 2021-mi Inatsisartunut qinersinermi kingullermiit 3.700-nik ikileriarput. Inatisartunullu ilaasortaatitai quliunukuugaluarlutik sisamaannanngorput.
Partii politikkikkut oqariartuutiminik ersarissaanngippallaarsimanera appariarujussuarnerup peqqutigisinnaagaa, Erik Jensen oqarpoq.
- Siumumi suliarisimasagut annertoorujorujussuupput. akisussaaffimmik annertoorujussuarmik kivitsisimavugut. Taannalu akisussaaffimmik tigusinitta imarisaanik aalajangikkat sunik imaqarsimaneri sunillu siunertaqarsimaneri pikkoriffigisimanngilagut innuttaasunut apuussuunnissai, Facebookikkut allatigullu torrallassimanngilarput, taamaattumik taanna Siumumut akisoorujorujussuuvoq.
- Taannalu akisussaaffik tamakkiisoq uanga qimarratiginavianngilara, aamma suliassartaa suliarineqarumaarpoq. Siumut inummiinngilaq, kisianni Siumut inuiaqatigiit pigisarivaat, taannalu annertuumik suliassaqarpoq, kiveqqinnissaanullu ingerlaqqittoqarnissaa qularutiginngilara pissasoq, taanna oqarpoq.
Akisussaaffik akeqarpoq
Erik Jensenilu partiimut siuttuuinnassanersoq nalorninarpoq.
- Siulersuisuunerit oqaloqatigissavakka. Taava soorunami taanna qanoq pisoqarumaarnersoq takutitsiumaarpoq, taava tassanngaanniik nalunaaruteqarumaarpugut, taanna oqarpoq.
Erik Jensen 645-nik qinerneqarpoq, partiimilu inunni ataasiakkaani qinerneqarnerpaalluni. Kingullermillu 2021-mi qinersisoqarnerani 1.186-nik qinerneqarnikuuneranut sanilliullugu qinersisui affaannanngorput.
Partiimut siulittaasuunikoq, Kim Kielsen, 612-nik qinerneqarluni Erik Jensen angumanngiluatsiarpaa, partiimilu siulittaasup tullia, Vivian Motzfeldt, 247-nik qinerneqarpoq.
Partii oqaluttuarisaanermi qinersinermi ingerlanerlunnerpaagaluartoq, aamma partiimik oqaluttuarisaanermi ingerlalluarnerpaaqarpoq. Demokraatimmi siulittaasuat Jens Frederik Nielsen tupaallangaarluni ajugaarujussuarpoq.
Demokraatit 8.500-nik qinerneqarlutik Inatsisartuni qulinik ilaasortaatitaqalerput. Naalakkersuisullu nutaat isumaqatigiissutiginissai Jens-Frederik Nielsenimit aqunneqartussanngorpoq.
Erik Jensen, illit isummanni Siumut Demokraatinut Naalakkersuisooqatigiinnissamut piareersimappat?
- Oqareernittuut siulersuisuunerit naapeqqaassaagut, taavalu qanoq alloriartoqaqqissanersoq nalilersussavarput. Kisianni akisussaaffik annertooq paarisimasarput akeqarpoq, taavalu massakkut isumaqatigiinniarnerit qanoq iluseqarumaarnissaat pissanganassaaq. Kisianni siulersuisuunikka oqaloqatigeqqaassavakka alloriarnerit tullii suussanersut paasissutissallu suunersut qulakkeeqqaalaariarlugit, taanna oqarpoq.
