Siumumi siulersuisuunerit Aleqa Hammond tikilluaqqugaat

Naalakkersuisunut siulittaasuusimasoq Aleqa Hammond pisortat aningaasaannik atornerluereerluni Siumumit 2016-imi ilaasortaajunnaarsitaareerluni Siumumut maanna uteqqippoq.
Aleqa Hammond Siumumut uterpoq. Assi © : KNR
Allattoq Mads Lynge, Mathies Hvid Toft
oktobarip 24-at 2021 15:47

Siumumi siulersuisuunerit Aleqa Hammondip partiimut uternissaa kissaatigisimavaat. Aleqa Hammond Siumumit 2016-imi ilaasortaajunnaarsitaagaluarpoq.

Aleqa Hammond Folketingimi ilaasortaanermini Folketingip kreditkortia atorlugu namminermut atuisimanera pissutigalugu Siumumi taamanikkut ilaasortaajunnaarsitaavoq, attaviitsutullu Folketingimi ilaasortaalerluni.

Hammond Nunatta Qitornaanni taamaasilluni maanna ilaasortaajunnaarpoq. Nunatta Qitornai inatsisartunut upernaaq apriilimi qinersinermi qinigaatitaqanngitsoorput.

Aleqa Hammond Facebookimi quppernermini ima allappoq:

- Siumup siulittaasuata saaffiginninneratigut kingornalu silersuisuunerit isumaqatigiittut tikilluaqqusinerisigut ippassaq Siumumut uterpunga, Aleqa Hammond allappoq.

Aleqa Hammond Siumumi siulittaasutut 2014-imi tunuarpoq.

Aleqa Hammondip nunatta karsianit 106.363,27 koruuninik namminermut atuisimasutut taamanikkut paasineqarpoq, timmisartumut billetsinut, akunnittarfimmi najugaqarnissamut, minibarinik atuinermut, neriniartarfimmut namminermullu assigiinngitsunik atuisimasutut pasineqarluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk