Siumut danskit naalakkersuisui pillugit: Ajunngilaannarmiit pitsaanerusumik angusaqarsinnaagaluarpugut

Kalaallit politikerii danskit nunatsinni akisussaaffiinut nalinginnaasumik pisinnaatitaaffeqarnissamut unammillingaatsiartariaqarput. Folketingimut ilaasortaq, Aki-Matilda Høegh-Dam (S) taama isornartorsiuivoq.
Suleqatigiilluarneq oqaluttuarisaanermi aatsaat taama pitsaatigisariaqanngikkaluartoq Aki-Matilda Høegh-Damip oqaaseqartarfimmit uparuarpaa.  Assi © : Ritzau Scanpix
juunip 23-at 2020 14:48

Danmarkimi naalakkersuisui socialdemokraatit ukiumi siullermi naalakkersuisuunerminni Kalaallit Nunaannut tunngasunik suliassaqaalussimapput.

Amerikamiut præsidentiata, Trumpip pisinissamik neqerooruteqarnera, meeqqanut misileraataasimasunut utoqqatsissuteqarnissap kinguartinneqarnera, amerikamiut aningaasaliinerat – eqqaaneqarsinnaasut ilagiinnarpaat.

Ukioq kalaallit isaanniit ataatsimut isigalugu ajunngitsoq, folketignimut ilaasortaq, Aki-Matilda Høegh-Dam isumaqarpoq. Tamanna Folketingimi ataasinngornermi naggasiutigalugu oqallinnermi erseqqissaatigaa.

Taassumali folketingimi ilaasortaanermini ukioq siullermi kalaallit qinikkat nalinginnaasunik angusaqarniarnerminni unammillingaatsiartariaqarnerat tamatuma saniatigut quarsaarutigaa.

Taassuma Naalakkersuisut danskillu naalakkersuisuisa suleqatigiinneranni aatsaat taama atalluartigisoqarnerarpaa. Suleqatigiilluarnerli oqaluttuarisaanermi aatsaat taama pitsaatigisariaqanngikkaluartoq Aki-Matilda Høegh-Damip oqaaseqartarfimmit uparuarpaa. 

Nalinginnaasunik angusaqarniarnitsinni taama unammillertigisariaqanngikkaluarpugut. Naligiinneq, suliani assigiinni akissarsiat naligiit... Susassaqarfinni danskit naalakkersuisuisa ukiorpassuarni akisussaaffigisaanni ajunngitsumik inissisimasoqarnissaanut taama unammillertigisariaqanngikkaluarpugut.

Assersuutigalugu Kalaallit Nunaanni politeeqarnermut eqqartuussiveqarnermullu susassaqarfiit danskit naalagaaffiata akisussaaffigisaat. Inatsisitigulli isumannaatsuunerup pitsaassusaa Danmarkimit nikingangaatsiartoq, Aki-Matilda Høegh-Dam isumaqarpoq.

- Naalakkersuinikkut atukkagut inatsimmi tunngaviusumi pituttorsimasumi ataasiutillugit inunnut assigiissumik inatsisitigut isumannaatsuunermik pilersitsisariaqarpugut, folketingimut ilaasortaq oqaluttarfimmiit oqarpoq.

Aki-Matilda Høegh-Damilli danskit nunatsinni akisussaaffigisaanni nutaamik pisariaqartitsisoqaraangat ’inuiaqatigiittut qinikkatut akisussaaffeqaqataatigalutik’, KNR-imit apersorneqarnermini sapaatip-akunnerata matuma siornaannaq oqaatigaa.

IA: Kalaallit ilaanngikkaangata Kalaallit Nunaat pineqartassanngilaq

Folketingimut ilaasortap, Aaja Chemnitz Larsenip, Inuit Ataqatigiinneersup, danskit naalakkersuisui nunatsinnut tunngatillugu suliniuteqarpallaannginnerarlugit sapaatip-akunnerata siuliani isornartorsiorpai.

Taassumali danskit naalakkersuisui assersuutigalugu nunatsinni meeqqanut inuusuttunullu susassaqarfimmut 80 millionit koruuninik aningaasaliinerannut Issittumilu Illersornissaqarfik aqqutigalugu nakkutilliisoqarnerulerneranut ataasinngornermi oqallinnermi qujassuteqarfigai.

Nunanulli allanut tunngasunut susassaqarfik equngasortaqangaatsiartoq, Inuit Ataqatigiinnit politikeri isumaqarpoq.

AAMMA ATUARUK Isornartorsiuereerluni: Aaja Chemnitz Larsenip danskit ministeriunerat ataatsimeeqatigileraa

Mette Frederiksenip nunatta aalajangiinissamut pisinnaatitaaffeqarnerulernissaa qinersisoqannginnerani neriorsuutigaa. Taassumali naalakkersuisuutitaqarnerani danskit naalakkersuisuisa nunami allami ataatsimiinneranni kalaallinit ilaasoqartuaannanngilaq.

- Kalaallit Nunaannut tunngasuni tamani Kalaallit Nunaat aamma ilaassaaq. Nunanut allanut tunngasunut ilaanngikkutta pilluta iliuuseqartoqassanngitsoq uagut tungitsinnit oqaaseralugu najoqqutaraarput, Aaja Chemnitz Larsen KNR-imut oqarpoq.

Ministeriunerup isornartorsiuineq oqallinnermi toqqaannartumik oqaaseqarfiginngilaa, oqarlunili:

- Naalagaaffeqatigiinneq nukittuvoq, nunarsuullu sinneranut atatillugu nunat pingasut sanilileriinnerat immikkuullarilluinnartuulluni.