Folketingimi ilaasortap Aaja Chemnitz Larsenip (IA) danskit naalakkersuisui attavigiuminaannerarlugit sapaatit akunneranni kingullermi isornartorsiorpai. Toqqorsivimmit assi.Assi: Anne-Katrine B. Olsen

Isornartorsiuereerluni: Aaja Chemnitz Larsenip danskit ministeriunerat ataatsimeeqatigileraa

Danskit ministeriunerata, Mette Frederiksenip (S), Folketingimi ilaasortaq IA-meersoq qaammatini qulini utaqqimaartereerlugu ataatsimeeqatiginissaanut piffissaqarfigilerpaa.

Aaja Chemnitz Larsen marlunngornermi juunip ulluisa 23-anni nalunaaqutaq 12.45 pingaarutilimmik pisassaqarpoq.

Danskimmi ministeriunerata Mette Frederiksenip (S) Folketingimimi ilaasortaq Inuit Ataqatigiinnersoq nalunaaquttap akunnerata affaanik sivisussusilimmik ataatsimeeqatiseralugu Folketingip aasaanerani matoqqalernisssaata aqaguani aggersarpaa.

AAMMA ATUARUK Ministeriunertaarnermit ukioq ataaseq: IA-p attaveqaqatigiilluarneq amigaatigigaa

Aaja Chemnitz Larsen qaammatini qulini utaqqimaareerluni, inuttaatalu danskit naalakkersuisui attavigiuminaannerarlugit isornartorsioreeraalu danskit ministeriunera ataatsimeeqatigisussanngorpaa.

- Danmarkip ministerii ilaat attavigiuminaapput. Ingammik ministeriuneq, ataatsimeeqatiserisareeraluarlugumi ataatsimeeqatiginissaanillu nukingisaartareeraluarlugu suli ataatsimeeqatiginngilarput. Tamanna uggornarpoq, Aaja Chemnitz Larsen KNR-imut sapaatit akunneranni kingullermi oqarpoq.

Ministeriuneq aggustimi, tassa Folketingimut qinersinermit qaammatit marluk qaangiummata, ataatsimeeqatisererngaarpaa.

Coronap ajornartoortitsinerani periarfissaqarsimanngitsoq

Mette Frederiksen Aaja Chemnitz Larsenilu ataatsimeeqatigiinnissaat periarfissaalatsineq peqqutigalugu maannamut ullulerneqarsinnaasimanngitsoq, ministeriuneqarfik KNR-imut allappoq.

- Kingusinnerpaamik marsip qeqqani ataatsimeeqatigiinnissaat pilersaarutaagaluarpoq, kisianni coronap ajornartoortitsineranik ulapputeqaratta kinguartipparput, ministeriuneqarfik KNR-imut allappoq.

Danskit naalakkersuisuisa Naalakkersuisut suleqatigilluaritik Christiansborgimilu politikerit nunanit avannarlerneersut attavigilluarusukkitik, ministeriuneqarfiup allakkamini erseqqissarpaa.

AAMMA ATUARUK Aki-Matilda Høegh-Dam: Danskit naalakkersuisuilu aatsaat taama attavigiilluartigaavut

- Danmarkip ministeriisa Folketingimi ilaasortanik, tamatumani nunanit avannarlerneersunik, suleqateqarluarnissartik pingaartippaat, aamma Folketingimi inatsisiliornermut politikerillu taakkua ukkataannut tunngasunik eqqartueqatigalugit ataatsimeeqateqakkajupput.

Aaja Chemnitz Larsenip ministeriuneq ataatsimeeqatigiguniuk, ilaatigut USA-p nunallu allat nunatsinni soqutigisaannut, nunatta nunanut allanut tunngasunut politikkimut sunniuteqarneranut danskillu naalagaaffiata nunatsinni akisussaaffiinut tunngasunik eqqartueqatigerusuppaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat