Siumut ataatsimeersuarnera ammarpoq
Siumup ataatsimeersuarnera ullaaq qulingiluanut sisimiuni skole 2-p timersortarfeeraani ammerneqarmat, aatsaat taamak amerlatigisunik peqataasoqartoq Siumumit oqaatigineqarpoq.
Sisimiuni ataatsimeersuarneq ammarneqarmat Siumumi ilaasortat 100-t missaanniittut peqataapput.
Ataatsimeersuariaqataasussat kujataaneersut silap ajornera pissutigalugu kingusinaalaaraluarlutik angumersisut peqataasussat Uummannameersut ilaat suli tikissimanngillat.
Siumup ataatsimeersuarnerata ammarneqarnerani ersersinniarneqarpoq folketing-mut qinersisimanerup inerneri Siumumit tulluusimarutigineqarnera.
Hans Enoksen-ip oqalugiarnermini ilanngullugu oqaatigaa folketing-mut qinersinermi Siumup kinguariarnissaanik tusagassiuteqarfiit ilimasussimagaluartut, tamannali uniorneqarsivoq.
Siumup ataatsimeersuarnerani Sisimiuni utoqqaat peqatigiiffiat oqalugiaateqartinneqarpoq, tassanilu utoqqaat peqatigiiffianni siulittaasoq Martin Berthelsen oqalugiaateqarluni.
Taasuma oqalugiarnermini oqaatigaa, utoqqaat qineqqusaaritigineqartarneri Siumumit mianersuutigineqarnerusariaqartoq. Nangillunilu oqarpoq qinersisoqartarnerup kingorna neriorsuutigineqarsimasut piviusunngunnikkaangata, utoqqarpassuit pakatsisartut, misigisarlutillu qineqqusaarutaannaasutut. Taamaammat Sisimiuni utoqqaat peqatigiiffiani siulittaasup Martin Berthelsen-ip Siumut kajumissaarpaa qinequsaartarnerni mianersornerusaqqullugit.
Ualeru nalunaaqutaq ataatsimiit Siumup siulittaasua Hans Enoksen nalunaaruteqassaaq, nalunaarullu aallaavigalugu siumumi ilaasortat akornanni oqallittoqassalluni.
