Aqqalu Lukassen U-20-ni nunarsuarmi nukittuneqqusaateqataalerpoq

Kina inuusuttuni nunarsuarmi nukittunersaava? Tamanna oktoberip aallartilaarnerani akissutissarsineqassaaq inuusuttut 20-it tikillugit nunarsuarmi nukittunerpaanngorniutilerput.

Unammeqataasussatut qaaqquneqartut ilagaat 17-nik ukiulik Aqqalu Lukassen Ilulissaneersoq, taannalu siorna nunat tamalaat unammineranni siullerpaamik peqataavoq. Ingerlalluaqigamilu siorna bronzennappoq.

- Massakkut inersimasupajaat unammisussanngorpakka U-20-nilu kisiartaallunga 18-it ataallugit ukioqarlunga, Aqqalu Lukassen KNR-mut oqarpoq.

Isumalluarporli siornalu peqataanermini misilittakkat katersani atorlualereerlugit.

- Siorna peqataaninni misilittakkat iluaqutaassapput aammami iluaqutigilereerpakka. Poorsuarnik tigumiarneq kivitseriaaserlu dødløft pitsanngortikusunnikuugakkit aalluppakka aammalu piareersarluarsimasutut misigalunga, Aqqalu Lukassen oqarpoq.

Pikkorinnerit akornanniikkusuppoq

Ujarassuarnik atlasinik taaneqartartunik tigumiartarneq aamma unamissutaasarpoq. Taakkuli Aqqalu Lukassenip illoqarfigisaani Ilulissani pissarsiassaanngillat.

- Atortut Ilulissani pigisavut aallaavigalugit sungiusarnera ingerlappara, Aqqalu Lukassen oqarpoq.

ONaallu unammisassani angajulliugaluartut kalaaleq nukittooq isumalluarpoq.

- Isumalluarpunga pikkorinnerit akornanniissinnaassallunga. Sapinngisannguara tamaat takutitsilluarniarumaarpunga taamaattumik ukioq manna qanoq ingerlajumaarnersunga pissanganartorujuuvoq, Aqqalu Lukassen oqarpoq.

Timip nukiisa tamaviaarsinnaanissaat eqqarsaatigalugu eqqarsartaatsikkut aamma piareersarpoq.

- Pitsaasumik eqqarsarniarsarivunga. Siorna ingerlalluarsinnaaguma taava eqqarsarpunga ukioq manna aamma ingerlalluarsinnaassallunga, Aqqalu Lukassen oqarpoq.