Nunarsuarmi inuusuttuaqqat nukittunerpaat pingajuat tassaavoq Aqqalu Lukassen
16-nik ukiulik Aqqalu Lukassen Ilulissaneersoq inuusuttuaqqani nunarsuarmi nukittunersat pingajuattut imminut taasinnaanngorpoq.
Taama inissittoqarpoq unammersuarnermi World Strongest Teenimi – inuusuttuaqqat nunarsuarmi nukittuneqqusaanneranni bronzennakkami.
Tamannalu pivoq naak 16-niit 19-it tikillugit ukiullit unammineranni siullerpaamik peqataalluni nukarlersaagaluarluni.
- Ujaminnattut qaqisarfiannut pinera oqaasertalersinnaanngilaraluunniit, Aqqalu Lukassen KNR-mut oqarpoq.
Nunarsuarmioqatigiinni oitsaanernut unammisoq
Peqataasut unammeriaatsini assigiinngitsuni tallimani unammereermata pointit katinneqarput.
- Unammeriaatsit ilai misilinnikuunngilakka. Taamaattumik tupaallaatigilaarpara taakkunani ingerlalluarama, Aqqalu Lukassen oqarpoq.
Aqqalu Lukassenip unammiartornerani angalasuni aqutsisoq Suulut Geisler Ilulissaneersoq aamma naammagisimaarinnippoq.
- Peqataasut allat nukittuneqqusaattarnermi pikkorinnersaapput peqataaniarlutillu piumasaqaatinik naammassinnittariaqarnikuullutik. Unammisai nunaminni nukittunersaapput, Suulut Geislerip pisunik KNR-mut paasinarsaavoq.
- Unammeriaatsit ilaanni Aqqalu Lukassen killilimmik sungiusarsinnaasimavoq aamma illoqarfigisatsinni atortut killeqaramik. Taamaattumik angusaq nuannersorujuuvoq, Suulut Geisler oqarpoq.
Ajugaasoq tassaavoq Ralf Sugget Tuluit Nunaanneersoq Conor Brady Irlandimeersoq tulliattut inissittoq.
