Mette Frederiksen arnanut spiralilersuisimanermut suliamut attuumassuteqartunut septembarip 24-ani utoqqatsissaaq
- Pinikuusimasut allanngortissinnaanngilagut. Kisianni akisussaaffimmik tigusisinnaavugut. Taamaattumik Danmarki sinnerlugu oqarusuppunga: Utoqqatserpunga.
Taamak spiralilersuisimanermik suliami arnanut eqqugaasunut, ministeriunerup Mette Frederiksenip Danmarki sinnerlugu utoqqatserluni qaammatip aallartisimalaarnerani tusagassiutinut nalunaarutaani allaqqavoq. Utoqqatsernerli allakkatiguuinnalinngilaq.
Ministeriuneq Katuami septembarip 24-ani nalunaaqutaq marlunut aaqqissuussinermi aamma utoqqatserniarpoq. Taamak Naalakkersuisut tusagassinut nalunaarumminni allapput.
Nunatta Danmarkimiit 1992-ip kingorna arnanut piumassuserinngisaminnik spiralilersorneqarsimasunut Naalakkersuisut siulittaasuat Jens-Frederik Nielsen aamma utoqqatserniarpoq.
Aaqqissuussami Naalakkersuisut siulittaasuat Jens-Frederik Nielsen arnanut 1992-ip kingorna, peqqinnissaqarfiup nunatsinnit akisussaaffigineqalernerata kingorna, kajumissuserinngisaminnik naartunaveersaaserneqarsimasunut aamma utoqqatserniarpoq.
Toqqaannartumik isiginnaarutikkut kalaallisut qallunaatullu KNR TV-ikkut aallakaatinneqassaaq, taamaasilluni pineqartut Nuummi najuussinnaanngitsut utoqqatserfiginninnermi malinnaasinnaaqqullugit.
Aaqqissuussaq suliami arnani eqqugaasuni sinniisoq suleqatigalugu pilersaarusiorneqassasoq tusagassiutinut nalunaarummi allaqqavoq.
Spiralilersuinerit kingunerluuteqarnartut
Suliamut tunngatillugu qulaajaanerup naammassineqannginnerani, septembarip aallaqqaataani tunniunneqarnissaanik killeqartoq, ullualunnik sioqqullugu Mette Frederiksen utoqqatserpoq. Utoqqatsertoqassappat qulaajaaneq naammassineqaqqaartariaqartoq, siornatigut ministeriuneq oqarnikuusimagaluarpoq.
Spiralilersuinermi nakerisarsiunngitsumik qulaajaaneq suli saqqummersinneqanngilaq. KNR-ip qallunaat peqqissutsimut ministeriaqarfiat Peqqissutsimullu Naalakkersuisoqarfik attaveqarfigaat, saqqummiunneqarnissaanullu pilersaarummik suli utaqqiuarsinnarput.
Spiralilersuinermi suliaq qanoq nunatsinni niviarsiaqqat arnallu tuusintilikkaat 1960-ikkunni 70-ikkunnilu spiralilerneqarsimasunut tunngavoq. DR-i naapertorlugu danskit oqartussaasuisa nunatsinni innuttaasut amerliartornerat unikaallatsinniarlugu periusissiaannut atatillugu tamanna pivoq.
Akuersinertaqanngitsumik spiralilersuinerit annernartut kingunerluuteqarnartullu arnarpassuarniit oqaluttuarineqarput. Niviarsiaqqat ilaat aqqaneq-marlunnik ukioqaannarlutik spiralilersorneqarsimapput, tamannalu inuunermik ilaani kingunerluuteqarujussuaatigaat. Arlallit tamatuma kingorna meerartaarsinnaajunnaarsimapput.
Spiralilersuisimanikkut mamianartuliaq saqqummiunneqarnerata kingorna, piffissami nutaanerusumi arnat arlallit akuersissuteqaratik naartunaveersaaserneqarsimanermik misigisaqarsimasut oqaluttuarput. Nunatta nakorsaaneqarfiata suliat 15-it, 1990-ikkut naalerneraniit 2000-ikkut tungaannut pisimasut ilisimavai.
Pisuni arlalinni arnat sinitsinneqarlutik naartuminnik peersitsineranni suliaritinnerminnut atatillugu, piumassuserinngisaminnik naartunaveersaaserneqarsimapput.
Taakkuuppullu arnat nunarput sinnerlugu naalakkersuisut siulittaasuata Jens-Frederik Nielsenip (D) utoqqatserfiginiagai. Naalakkersuisuttaaq oqarput, taakkua arnat piumassuserunngisaminnik naartunaveersaaserneqarsimasut kingusinnerusukkut taarsiivigineqarnissartik naatsorsuutigisinnaagaat.
Mette Frederiksenimiit utoqqatserneq aningaasanik taarsiiffigineqarnermik ilaqassanersortaaq suli ilisimaneqanngilaq.
Arnat 143-t spiralilersuisimanermik suliaq pillugu danskit naalagaaffiat eqqartuussivimmut tunniukkaat, marsimi 2024-mi KNR-imit oqaluttuarineqarpoq. Inuit pisinnaatitaaffiinik unioqqutitsisinermut taarseeqqusissutaat 43 millionit koruunit missaanniipput.
