Siumut Air Greenlandimut piginneqataassutsimik piserusunngitsoq
![](/sites/default/files/styles/image_934x467/public/siumut_steve_sandgreen_kim_kielsen_karl_kristian_kruse_doris_jakobsen_jensen.jpg?itok=0hIW1Hjd)
IA-p piginneqataassutsip sinnera nunatsinnit pisiaritikkusuppaa, Namminersorlutik Oqartussallu taamaalillutik suliffeqarfimmik aqutsisinnaanerulissapput. Air Greenlandillu isumassarsiaq akuersaarpaa, Siumulli qujaannarpoq.
- 1 koruunilerlugu neqeroorfigitikkaluarutta, aap soqutiginnissaagut. Milliardikkuutaanilli naleqarluni attaveqaqatigiinnikkut inissisimaffitsinnik allaanerusumik ineriartortitsilernissaq pisariaqalersillugu, taava maannakkut pisiarinissaanut oqalunneq piffissaanngilaq, partiip siuliuttaasuata tullia, Karl Kristian Kruse allalluni taama akissuteqarpoq.
AAMMA ATUARUK Air Greenlandip nunatsinnit tamakkiisumik pisiarineqarsinnaanini tapersersorpaa
Taassuma Ilulissani, Nuummilu mittarfiit tallineqarnissaannut Qaqortumilu mittarfiliornissamik pilersaarutit innersuussutigai. Aningaasaliinerit taakku katillugit milliardikkaanik naleqarput.
- Mittarfissualiornikkut ineriartortitsinissaq malitsigisussaavaa nunatsinnut aningaasaqarnikkut kaaviiaartitsineq, taannalu takornariaqarnikkut aalisakkanillu avammut tunisisalernissaq siuarsassavaa, pingaarnertullu inuiaqatigiinnut eqaatsumik akikinnerusumillu angalanissamut pilersitsisussaalluni, Karl Kristian Kruse Siumut sinnerlugu akissuteqarpoq.
Erik Jensenip timmisartukkut angallassineq tiguniaraa
Parteeqataali, Erik Jensen attaveqaqatigiinnermut naalakkersuisuusimasoq apeqqummut allamik isumaqarpoq. Taassuma Air Greenlandippiginneqataassutaa 62,5 procentiusoq danskit naalagaaffiannit SAS-imiillu pisiarinera kalaallinut inuiaqatigiinnut aningaasatigut iluaqutissartaqarsinnaanersoq misissornissaa naleqarnerarpaa.
- Innuttaasunut kiffartuussineq pitsanngorsassagutsigu akisussaaffiup nunatsinnit tiguneqarnissaa assortugassaanngilaq, Erik Jensen KNR-imut oqarpoq.
Attaveqaqatigiinnermut Naalakkersuisuusimasup qinigassatut allatut, kalaallit Air Greenlandimut piginneqataassutaa tuneriarlugu timmisartuutileqatigiiffimmik nutaamik nunatsinnit 100 procentimik pigineqartumik pilersitsisoqarnissaasoraa.
Erik Jensenilli politikkikkut aalajangiisoqartinnagu iliuuserineqarsinnaasut taakku tamarmik aningaasatigut misissuiffigineqaqqissaartariaqarnerarpai.
AAMMA ATUARUK Air Greenland skal ejes helt af Grønland
AAMMA ATUARUK Demokraterne vil undersøge privatisering af Air Greenland