Siumup gruppia ataatsimoorluni borgmesterip tullianik inassuteqartoq
Qinersinerni taaguunneqarnerpaat borgmesterinngortarnerat ileqquugaluartoq, Otto Jeremiassenip borgmesterip tullia siulliattut inissittussanngornera Otto Jeremiassenip ima nassuiarpaa.
- Ataatsimiititaliani siulittaasoqartussaavugut, ataatsimiititaliani ilaasortaqartussaavugut, taakkualu suliassat qanoq ittuussusaat aallaavigalugit, gruppip tallimanik inuttaqartup, isumaqatigeeqqissaarluni viceborgmesteritut issianissara innersuussutigaa, Otto Jeremiassen oqarpoq.
Taanna 136-nit taaguunneqarluni Siumumi Qaasuitsup kujasissortaani taaguunneqarnerpaat sisamaraat, Jess Svanelu 185-init taaguunneqarluni taaguunneqarnerpaajuvoq.
Siumumi Qaasuitsup kujasussortaani taaguunneqarnerpaat
Jess Svane 185
Enok Sandgreen 182
Timooq Mølgaard 173
Otto Jeremiassen 136
Kristian Jeremiassen 124
Nikolaj Jeremiassen 114
Kristian Broberg 102
Enok Sandgreen Nikolaj Jeremiassenilu Inuit Ataqatigiinnut isumaqatigiissuteqaqataanngillat
Siumullu gruppiata innersuussutaa Jess Svanemit akuerineqarnersoq Otto Jeremiassen aperineqarami ima akivoq.
- Tassa tamarmi. Oqareernertut, 100 procent angullugit isumaqatigeeqqissaarpugut. Gruppitsinni ataqatigiittorujussuullutalu suleqatigiilluartorujussuuvugut, Otto Jeremiassen oqarpoq.
Jess Svanep borgmesterip tullia siullianut inassuteqarneq KNR-imut ullumi oqaaseqarfigerusunngilaa. Gruppili ataatsimoorluni Otto Jeremiassenimik innersuussisoq uppernarsarpaa.