-Iliuuseqartariaqarpugut: Meeqqat inuusuttullu akornanni pinerluttarnerit amerligaluttuinnartut
Meeqqat inuusuttullu akornanni nakuusernerit nalunaarutigineqartut 2024-miit siornamut 34 procentimik amerleriarput. Tamannalu iliuuseqarfigineqartariaqartoq, Bo Martinsen Demokraatineersoq isumaqarpoq. Siunissarpummi pineqarpoq.
Allattoq Jonna Enoksen Dahl
oktobarip 14-at 2026 13:49
Nunatsinni meeqqat inuusuttullu akornanni pinnerlunnerit annertusigaluttuinnarneri ajornartorsiutaaleriartuinnarpoq.
-Iliuuseqartariaqarpugut, Bo Martinsen Demokraatineersoq oqarpoq.
Taassuma meeqqat inuusuttullu akornanni pinerlunnerit annertusigaluttuinnarneri qanoq pinaveersaartinneqarsinnaanersut Inatsisartunut oqallisissiaraa.
Pinerlunnerit annertusigaluttuinnarneri iliuuseqarfigineqartariaqartoq partiit tamarmik isumaqatigiissutigaat.
Meeqqat inuusuttullu 15-init 17-inut ukiullit pinerluttulerinermi inatsimmik nalunaarutiginninnerit 447-upput, taakkua 2024-mut sanilliukkaanni 71-inik amerleriarput.
Eqimattat taakkunani toqutsinerit nakuusernerillu siorna 91-iupput, 2024-mut sanilliukkaanni 34-nik amerleriarput.
Pinerluttut 15-init 17-inut ukioqartut akornanni iluanaarniutigalugu pinerlunnerit siorna 148-upput, 2024-mi 122-ullutik.
Kalaallit Nunaanni Politiit ukiumoortumik kisitsisaataat ukioq manna saqqummertumi taama allaqqavoq.
Inatsisartut ataatsimiinneranni oqaluuserineqartoq
Meeqqat inuusuttullu akornanni pinerlunnerit inuiaqatigiinni initoorujussuusoq, Bo Martinsen KNR-imut oqarpoq. Taannalu peqqutigalugu oqallisissiamik siunnersuuteqarpoq.
-Siunnersuut qaqinnikuuara pissutigalugu inatsisartut akornatsinni partiit eqqartuinitsinni oqallinnitsinnilu aqqummik nassaaqatigiissinnaanissarput ujartorusullugu, qanoruna isilluta inuusuttut tassunga killinnginnissaannut suliniutinik annerusumik pilersitsisinnaasugut.
Partiit tamarmik oqallinnerminni meeqqat inuusuttullu 18-it ataallugit ukiullit akornanni pinerlunnerit pinaveersaartinnissaannut siunnersuuteqarput.
Atassummiit oqaaseqartoq Aqqalu C. Jeremiassen oqalugiarnermini inuiaqatigiinni sakkortuumik misigisaqartoqartillugu timikkut eqqarsartaatikkullu ajoqusernernut katsorsaasalernissamik periusissamik Naalakkersuisut ujartueqquai.
Siumumit oqaaseqartup Erik Jensenip pinaveersaartitsinermik suliallit nukittuut aamma politiit ikiortit nukissaqarluartut pisariaqartinneqartut oqariartuutigaa.
Angajoqqaat perorsaalluarnissaat aallunneqartariaqartoq Inuit Ataqatigiit sinnerlugit oqaaseqartoq Paarma Lund Kreutzmann isumaqarpoq.
Meeqqat inuusuttullu pinerluttuliortarneranut kinguneqartitsisalernissaq pisariaqartoq, Demokraatit oqaaseqartuat Karen Marie Kyed Frederiksen oqarpoq.
Qinikkat meeqqat inuusuttullu tusarnaarnerusariaqaraat, Naleqqamiit oqaaseqartoq Aki-Mathilda Høegh-Dam oqarpoq.
Suliniuteqartoqartariaqartoq
Ilusilersorluakkamik pinaveersaartitsinerup qitiutinneqarnerunissaa pisariaqariaqartoq Meeqqanut Inuusuttunullu Naalakkersuisup Mariane Paviasen Jensen (IA) oqarpoq.
-Uani pineqartut tassaapput siusissukkut iliuuseqarneq, imigassamut politikki nutaaq, pitsaasunik toqqissisimanartunillu angerlarsimaffeqarneq, ulluunerani paaqqinnittarfinnut immikkoortoq patajaatsoq meeqqallu atuarfiat ingerlalluartoq.
Siunnersuut partiiniit tamanit tigulluarneqartoq Bo Martinsen isumaqarpoq.
Meeqqanut inuusuttunullu Naalakkersuisup suleqataarusulluni oqariartuutaa inatsisartuni ilaasortap isumalluarfigaa.
-Ataatsimiitsitaliami ingerlaqqittoqassappat, siunnersuummik pisoqassappat, aaliangiiffissamik siunnersuummik qaqitsisoqassappat qilanaarinerarlugu oqartornera taanna isumalluartitsisorujussuuvoq. Iliuuseqartariaqaratta, Bo Martinsen oqarpoq nangillunilu:
-Sapinngisamik isumaqatigiilluta siunnersuusiorsinnaagutta uanga taanna angorusuttorujussuuara. Inuusuttagut siunissaraagut aamma ikiornissai tamaavitta akisussaarfigaarput.
