Trump: Kalaallit Nunaanni uuliasiortoqangaatsiarlunilu gassimik qalluisoqarsinnaalernissaa misissorneqalerpoq
Kalaallit Nunaanni uuliasiorlunilu, gassimik qalluisoqarsinnaanissaa, aatsitassanillu Kalaallit Nunaanni kusanaqisumi ujarlertoqangaatsialerpoq.
USA-p præsidentia Donald Trump inoqatinut nammineq attaveqartarfimmini Truth Socialimi taama ilaatigut allappoq.
- Uuliasiorneq, gassimik ujarlerneq aatsitassanillu qalluisinnaanissamut periarfissat annertuut Kalaallit Nunaanni pigisatsinni kusanaqisumi ujartorneqalerput.
- Uulia sapernanngeqisumik qallorneqarsinnaasoq annertoqisoq immikkut ilisimasallit oqaatigaat, nunani tamalaani aatsaat taama annertutigisumik qalluisoqarsinnaassalluni, Trump allappoq.
Misissuinerit suut pineqarnersut præsidentip itinerusumik oqaaseqarfiginngilai.
Kalaallit Nunaata USA-p Europallu saassunneqaratarsinnaanerannut atatillugu pingaaruteqassusaa Trumpip tikkuarpaa, Kalaallillu Nunaat tassunga atatillugu nalissaqanngitsoq oqaatigalugu.
Donald Trumpip Truth Social aqqutigalugu assimik Kalaallit Nunaannut tunngasumik unnuaq saqqummiussereersorlu Kalaallit Nunaanni uuliasiortoqalerlunilu gassimik qalluisinnaanissaa pillugu misissuisoqalersoq, aatsitassanillu aamma piiaasoqarsinnaanissaa pillugu misissuisoqangaatsialersoq Trumpip oqaatigaa.
USA, Kalaallit Nunaat Danmarkilu sillimaniarneq illersornissarlu pillugu isumaqatigiissut nutaaq sivisuumik isumaqatigiinniutigineqarsimasoq septembarip naalernerani atsiorpaat.
Donald Trump Naalagaaffiit Peqatigiit ataatsimeersuarneranni oqalugiaqqammersorlu
Naalagaaffiit Peqatigiit New York Citymi illorsuanni atsioqatigiittoqarpoq.
USA isumaqatigiissut naapertorlugu Kalaallit Nunaanni sakkutooqarfinnik nutaanik marlunnik pilersitsisinnaassaaq. USA Pituffik Space Basemi maanna sakkutooqarfeqarpoq.
USA-p missilinut illersuutaata Golden Domep nunatsinni aamma atuutsilersinnaagaa isumaqatigiissutigineqarpoq, missilinut dronenullu illersuutitut atorneqarsinnaassalluni.
- USA siunissami saassunneqassappat Kalaallit Nunaat qulaallugu saassusisoqartariaqassaaq, dronet, missilit sakkussialluunniit nutaat suussagaluarnersut Golden Dome atorlugu nakkartinneqarsinnaassallutik, Trump allappoq, nangillunilu:
- Nunanullu allanut naleqqiullugu piffissaqarlutalu inissisimaffeqarluarlutalu nakkutiginnissinnaanermut tamanna periarfissiivoq, Trump allappoq.
Ritzau
